ԱԱԾ քննչական վարչությունում ավարտվել է քաղաքական գործունեությունը դադարեցնելու նպատակով ՀՀ Նախագահի նախկին թեկնածու, ԱԻՄ կուսակցության առաջնորդ Պ.Հայրիկյանի դեմ մահափորձ կատարելու դեպքի առթիվ հարուցված քրեական գործի նախաքննությունը: Քրեական գործով դատավարական ղեկավարում իրականացնող դատախազը հաստատել է մեղադրական եզրակացությունը:

Դատախազության մամուլի ծառայությունից հայտնում են, թե մինչդատական վարույթում ձեռք բերված փաստական տվյալների համաձայն` 2013թ. փետրվարի 18-ի ընտրություններում որպես ՀՀ Նախագահի թեկնածու գրանցված Վ.Սեդրակյանը 2013թ. հունվարի սկզբներին Ս.Հարությունյանին եւ Խ.Պողոսյանին պատվիրել է ԱԻՄ կուսակցության առաջնորդ, ՀՀ Նախագահի մեկ այլ թեկնածու Պ.Հայրիկյանի սպանությունը` նրա քաղաքական գործունեությունը դադարեցնելու նպատակով:

Զենք ձեռք բերելու համար Վ.Սեդրակյանը Ս.Հարությունյանին եւ Խ.Պողոսյանին գումար է տվել, որը նրանք կիսել են միմյանց միջեւ, իսկ հանցագործությունն իրականացնելու համար օգտագործել Խ.Պողոսյանի կողմից ապօրինի ձեռք բերված եւ պահված 7,62մմ տրամաչափի «Նագան» տեսակի թմբուկավոր ատրճանակը:

Ըստ պայմանավորվածության` սպանությունն անմիջականորեն պետք է իրականացներ Խ.Պողոսյանը, իսկ Ս.Հարությունյանը` նրան սպասեր ավտոմեքենայում:

2013թ. հունվարի 31-ին` ժամը 23:20-ի սահմաններում, Պ.Հայրիկյանի տան շքամուտքի մոտ, Խ.Պողոսյանը երկու անգամ կրակել է Պ.Հայրիկյանի կրծքավանդակին եւ դիմել փախուստի` չկարողանալով հանցագործությունն ավարտին հասցնել` իր կամքից անկախ պատճառներով:

Ձեռք բերված ապացույցների հիման վրա Վ.Սեդրակյանին մեղադրանք է առաջադրվել ՀՀ քրեական օրենսգրքի 38-34-305-րդ հոդվածով (Պետական, քաղաքական կամ հասարակական գործչի սպանության փորձը կազմակերպել), Խ.Պողոսյանին` ՀՀ քրեական օրենսգրքի 34-305-րդ հոդվածով (Պետական, քաղաքական կամ հասարակական գործչի սպանության փորձ) եւ 235-րդ հոդվածի 1-ին մասով` (Ապօրինի կերպով զենք ձեռք բերելը, պահելը եւ իրացնելը), իսկ Ս.Հարությունյանին` ՀՀ քրեական օրենսգրքի 34-305-րդ հոդվածով (Պետական, քաղաքական կամ հասարակական գործչի սպանության փորձ):

Քրեական գործը մեղադրական եզրակացությամբ ուղարկվել է Երեւան քաղաքի Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարան:

Լուսանկարը՝  Արսեն Սարգսյանի/NEWS.am