Աֆղանստանում խաղաղարարական առաքելությանը մասնակցելու համար վրացի զինծառայողների հասցեին թալիբների սպառնալիքներով տեսագրությունը տեղադրվել է Վրաստանից եւ թալիբների հետ ոչ մի կապ չունի: Այս մասին  հայտնել է  Վրաստանի ներքին գործերի նախարար Իրակլի Գարիբաշվիլին: 

«…Այդ տեսագրության հայտնվելը ոչ մի կապ չունի «Թալիբանի» հետ: Ըստ  ստացված տեղեկությունների` տեսագրությունը տեղադրվել է Վրաստանից, IP-հասցեն եւ գտնվելու վայրը պարզվել է: Ներկայումս ակտիվ քննչական գործողություններ են տարվում, միացել է ՀԴԲ-ն, մեզ ակտիվ օգնում է նաեւ Իսրայելը», - ասել է Գարիբաշվիլին, հաղորդում է «Նովոստի Գռուզիան»:

Հիշեցնենք «Թալիբյան ջիհադ՝ ընդդեմ Աֆղանստանում վրացական զորքերի» անվանմամբ տեսանյութը YouTube-ում տեղադրվել էր  հունիսի 5-ին։ Դրանում ասված է, որ այդ տարածքը գրավել փորձող «խաչակիրներին» պատժել է Ալլահը, իսկ վրացի զինծառայողներն անվանվում են «նոր խաչակիրներ Վրաստանից», նաեւ նշվում է, որ նրանց նույն ճակատագիրն է սպասվում:

Վրաստանում ճշտում են թալիբների սպառնալիքներով տեսանյութի իսկությունը

Հունիսի 6-ին հայտնի էր դարձել, որ  Հիլմենդ նահանգում վրացական կայանի վրա  ահաբեկիչների հարձակման հետեւանքով ISAF-ի կազմում ծառայություն անցնող վրացի  յոթ զինծառայող  զոհվել, ինը վիրավորվել էին։