Նախընտրելի
Վանաձոր քաղաքում երեխայի վաճառքի գործով երեկ՝ օգոստոսի 5-ին բերման ենթարկվածների մեջ եղել են մանկատան տնօրենն ու մարզպետարանի աշխատակիցը: NEWS.am-ի թղթակցի փոխանցմամբ, Վանաձորում տարածված խոսակցությունների համաձայն ոստիկանության հաղորդագրության մեջ նշվող 1955թ. ծնված Արշալույս Հ.-ն Վանաձորի մանկատան տնօրեն Արշալույս Հարությունյանն է, իսկ 1973թ. ծնված Նարեկ Ս.-ն Լոռու մարզպետարանի ընտանիքի, կանանց երեխաների պաշտպանության բաժնի պետ Նարեկ Սարգսյանն է:
Ոստիկանությունից NEWS.am-ի հետ զրույցում ոչ հաստատել, ոչ հերքել են՝ նշելով, որ դեպքի մասին առավել մանրամասն տեղեկատվությունը կտեղադրվի կայքում ավելի ուշ:
Նարեկ Սարգսյանի հետ կապ հաստատել այդպես էլ չհաջողվեց, բաժնում հաստատեցին, որ առավոտից աշխատանքի չի ներկայացել: Արշալույս Հարությունյանն էլ NEWS.am-ի Լոռիի թղթակցին հայտնել է, որ երեկ իսկապես Տիգրան Մեծ պողոտայից հրավիրվել է ոստիկանության մարզային վարչություն՝ որպես վկա:
Ըստ ոստիկանության լրատվության վարչության տարածած հաղորդագրության, ոտիկանության քրեական հետախուզության, կազմակերպված հանցավորության դեմ պայքարի գլխավոր վարչությունների, Երեւան քաղաքի վարչության մետրոպոլիտենի պահպանության բաժնի եւ Լոռու մարզային վարչության ծառայողները օգոստոսի 5-ին, ժամը 18.20-ին, երեխայի առուվաճառք կատարելու կասկածանքով, Վանաձոր քաղաքի Տիգրան Մեծի պողոտայի թիվ 41 շենքի մոտից Լոռու մարզային վարչություն բերման են ենթարկել Աննա Է.-ին, 1961 թ. ծնված Գեղեցիկ Վ.-ին, 1985 թ. ծնված Սերինե Ա.-ին, իսկ Վանաձոր քաղաքի համալիրի մոտից` 1973 թ. ծնված Նարեկ Ս.-ին եւ Վանաձոր քաղաքի Տիգրան Մեծի պողոտայում գտնվող հանրախանութի մոտից` 1955 թ. ծնված Արշալույս Հ.-ին, որոնք, համաձայնության գալով օտարերկրյա քաղաքացուհի 1980 թ. ծնված Ալլա Հ.-ի հետ, պայմանավորվել են 15.000 դոլարով վերջինիս վաճառել անչափահաս, 2009 թ. ծնված Ռիմա Ա.-ին:
Պայմանավորվածության համաձայն` օգոստոսի 5-ին, Գեղեցիկ Վ.-ն երեխայի վաճառքի համար Ալլա Հ.-ից պահանջել եւ ստացել է 7.000 դոլար, իսկ մնացած 8.000 դոլարը, ըստ նախնական պայմանավորվածության, Ալլա Հ.-ն Գեղեցիկ Վ.-ին պետք է հանձներ մի քանի օրվա ընթացքում:
Փաստի առթիվ ոստիկանության քննչական գլխավոր վարչությունում ՀՀ քրեական օրենսգրքի 168 հոդվածի 1-ին մասի հատկանիշներով հարուցվել է քրեական գործ:
Աննա Է.-ն եւ Գեղեցիկ Վ.-ն ձերբակալված են, կատարվում է նախաքննություն:
Ինչպես ավելի վաղ հայտնել էր NEWS.am-ը, օգոստոսի 5-ին ոստիկանությունը ձերբակալություններ է իրականացրել Վանաձորում: Ոստիկանության կազմակերպված հանցավորությունների դեմ պայքարի դիմակավորված անձինք Վանաձորի կենտրոնական` «Հայքի» հրապարակում վայրկյանների ընթացքում իջել են մեքենաներից ու մի խումբ անձանց ձերբակալել, որոնց մեջ եղել են նաեւ օտարերկրացիների նմանվող մարդիկ: Այս ամենը նաեւ տեսանկարահանվել է:
Այլ մանրամասներ քիչ ուշ:
