Երեւանի քաղաքապետ Տարոն Մարգարյանը մասնակցել է Ավան վարչական շրջանի Մյասնիկյան պողոտային հարող տարածքում ձեւավորված նորակառույց պուրակի հանդիսավոր բացմանը:

Երեւանի քաղաքապետարանի տեղեկատվության եւ հասարակայնության հետ կապերի վարչությունից հայտնում են, թե երկար տարիներ անխնամ տարածքի տեղում շուրջ 6 ամիս առաջ մեկնարկած շինարարական աշխատանքների շրջանակում 2,2 հեկտար մակերես ընդգրկող պուրակի ամբողջ երկայնքով կառուցվել են 1250 քմ սալապատ ճեմուղիներ՝ 1300 գծամետր եզրաքարերով: Տեղադրվել են նստարաններ, աղբամաններ: Պուրակն առանձնանում է ձեւավորման հետաքրքիր լուծումներով՝ գործող ժամացույցով եւ ջրվեժով: Տարածքն ապահովված է նաեւ արտաքին լուսավորության ցանցով՝ այդպիսով հնարավորություն ընձեռելով հանգիստը կազմակերպել նաեւ երեկոյան ժամերին:

Քաղաքապետ Տարոն Մարգարյանը բնակիչների հետ միասին շրջել է տարածքով եւ ծանոթացել կատարված աշխատանքներին: Վարչական շրջանի ղեկավարը պուրակի նախագծի վրա քաղաքապետին է ներկայացրել աշխատանքների ամբողջ ընթացքն ու տարածքի սկզբնական տեսքից մինչեւ ավարտական փուլը:  Ծանոթանալով կատարված աշխատանքներին՝ Տարոն Մարգարյանը տեղում հանձնարարել է կանաչապատման ծավալների ավելացման ուղղությամբ համապատասխան աշխատանքներ տանել: Բնապահպանության վարչության պետը քաղաքապետին զեկուցել է, որ արդեն առաջիկա ծառատունկի ընթացքում պուրակը կհամալրվի տարբեր ծառատեսակներով:

Նորակառույց պուրակի բացմանը շտապած բնակիչները, զրուցելով քաղաքապետի հետ, իրենց շնորհակալությունն են հայտնել հանգստի կազմակերպման նման հարմարավետ գոտու կառուցման համար: Տարոն Մարգարյանը  հորդորել է բնակիչներին խնամքով վերաբերվել եւ իրենց հերթին անել հնարավորը պուրակի պահպանման համար:

Պատասխանելով լրագրողների հարցերին՝ քաղաքապետն ընդհանուր առմամբ գոհունակություն է հայտնել կատարված աշխատանքների մասով ու նկատել, որ շինարարության ընթացքում աշխատանքների որակի եւ ժամկետների նկատմամբ պատասխանատուների կողմից սահմանված է եղել ամենօրյա հսկողություն:

«Տարիներ շարունակ բազմիցս են դիմել այս տարածքում կառուցապատում իրականացնելու համար, սակայն մեր կողմից մշտապես մերժվել են այդ դիմումները: Մայրաքաղաքի կանաչ տարածքների ընդլայնման ծրագրերի շրջանակում որոշում կայացվեց այս եւ նման այլ տարածքներն  ընդգրկել քաղաքապետարանի 2013 թվականի տարեկան ծրագրում  եւ ստեղծել հանգստի գոտի: Այդ նպատակով Երեւան քաղաքի բյուջեից ծախսվել է շուրջ 40 մլն դրամ, զուգահեռ ներդրումներ են կատարվել նաեւ  բարերարների կողմից: Համոզված եմ՝ այս այգին եւս կդառնա ինչպես Ավանի եւ Նոր Նորքի բնակիչների, այնպես էլ բոլոր երեւանցիների համար հանգստի կազմակերպման իսկակապես հաճելի անկյուն: Նման այգի-պուրակներ նախատեսում ենք կառուցել նաեւ մյուս վարչական շրջաններում: Սա եւս մեկ կարեւոր քայլ էր Երեւան քաղաքում կանաչ տարածքների ավելացման ուղղությամբ մեր որդեգրած քաղաքականության շրջանակում»,-ընդգծել է քաղաքապետ Տարոն Մարգարյանը:

Ի դեպ նշենք, որ Երեւանի քաղաքապետարանի կողմից մայրաքաղաքի կանաչապատմանն ուղղված աշխատանքների շրջանակում նոր այգի-պուրակների տարածքները  2012 թվականի 5 հեկտարի համեմատ այս տարի կազմել են 8 հեկտար: