Հայաստանի խորհրդարանը  երկրորդ եւ վերջնական ընթերցմամբ  ընդունել է 2013թ. օրինագծերի վերջին փաթեթը՝ տաքսիների մասին օրինագծերի  փաթեթը: Սրանով խորհրդարանի արտահերթ նստաշրջանն ավարտել է աշխատանքը:

 «Ավտոմոբիլային տրանսպորտի մասին» օրենքում փոփոխությունների նախագիծը եւ կից  օրինագծերը պարզեցնում են տաքսու վարորդների լիցենզավորման կարգը եւ անհատ տաքսու վարորդներին հնարավորություն տալիս պետգրանցում չանցնել եւ մնալ ֆիզիկական անձի կարգավիճակում:  Իսկ այժմ լիցենզիա ստանալու համար կարելի է դիմել ոչ միայն Երեւան, այլ նաեւ մարզպետարաններ: Դրանից հետո սահմանված ժամկետում վարորդն ստանում է ինքնասոսնձվող կտրոն` մեքենայի հետնապակու համար, որը փոխարինելու է նախկին համարներին:

Սպառողների իրավունքների պաշտպանության շահերից ելնելով` խորհուրդ է տրվում տաքսիներում գնացուցակի պահանջ ներմուծել  (ներառյալ 1 կմ-ի արժեքը, նվազագույն վճարը եւ սպասելու համար վճարը): Արգելվում է ծխել տաքսիներում, իսկ ապակիներն իջեցնել կամ երաժշտությունը միացնել կարելի է միայն ուղեւորի եւ վարորդի փոխադարձ համաձայնությամբ: 

Անհատ տաքսու վարորդի լիցենզիայի տուրքն առաջարկվում է ավելացնել տարեկան 25-ից մինչեւ 100 հազար դրամ: Այդ նույն տուրքը կգործի  նաեւ մինչեւ չորս մեքենա ունեցողների համար, այնուհետեւ ավելանում է մինչեւ 200 հազար դրամ: (Նախկինում տարեկան 200 հազար դրամ վճարում էին մեկից ավելի տաքսի ունեցողները): Երկրորդ տուրքը վերաբերում է Երեւանի եւ մարզերի տարբերակմանը:  Երեւանում ֆիզիկական անձանց համար տուրքը կկազմի ամսական 12 հազար դրամ: Այլ քաղաքներում, գյուղերում եւ սահմանամերձ գյուղերում տուրքը նվազում է  ամսական մինչեւ չորս հազար դրամ:

Օրինագծերի փաթեթն ընդունելու դեպքում  սպասվում է, որ մասնավոր հատվածը կստանա 1,65 միլիարդ դրամ` եկամուտների եւ հարկերից ու տուրքերից արված խնայողությունների տեսքով: