Նախընտրելի«Շարժում-96» կուսակցության ղեկավար Ռուբեն Թորոսյանն իր տարակուսանքն է հայտնում, որ «Սերժ Սարգսյանը ԲՀԿ-ի՝ օրենքին հակասող «անվճար բուժօգնության» կանխման փոխարեն, իր հանրապետականներին է լծել այդ գործին»: Խոսքը վերաբերում է նրան, որ հուլիսի 16-ին Արմավիրի մարզի շրջակա քաղաքային եւ գյուղական բնակավայրերի ազգաբնակչության համար անցկացվել է անվճար բուժօգնություն, որը նախաձեռնել է ՀՀԿ-ի մարզային ծրագրերի համակարգման հանձնաժողովը՝ ՀՀ նախագահի աշխատակազմի ղեկավար Կարեն Կարապետյանի գլխավորությամբ: Ծրագրի շրջանակներում սպասարկվել են շուրջ 620 հոգի: Ծրագիրը մեկնարկել է 2010թ. հունիսի 30-ից եւ նվիրված է ՀՀԿ 20-ամյակին: Այս կապակցությամբ Ռուբեն Թորոսյանը նշում է.
«Պետական պաշտոն զբաղեցնող կուսակցության անդամը (Կարեն Կարապետյանը) իրավունք չունի իր ծառայողական (պաշտոնեական) դիրքն օգտագործել հօգուտ կուսակցական շահերի («Կուսակցությունների մասին» ՀՀ օրենքի 10-րդ հոդված): Կուսակցությունը (ՀՀԿ) բարեգործական կազմակերպություն չէ («Բարեգործության մասին» ՀՀ օրենքի 11-րդ հոդված) կամ չի կարող բարեգործական գործունեություն իրականացնել («Կուսակցությունների մասին» ՀՀ օրենքի 3-րդ հոդված): Ամեն ծախս չէ, որ բարեգործական է համարվում («Բարեգործության մասին» ՀՀ օրենքի 14-րդ հոդված):
Եթե Ս. Սարգսյանին սա այլեւս չի զարմացնում, ապա դժվար է հասկանալ հարկատուներիս միջոցները վատնող ՀՀ նախագահի աշխատակազմի քաղծառայողների «եվրոպականացված» բանակի լռությունը կամ մասնակցությունը ՀՀ օրենսդրության բացահայտ խախտումներին: Հավանաբար, այստեղ իր դերն է խաղում նաեւ անողնաշար ԵԽԽՎ-ն՝ իր չկատարվող որոշումներով»:
