ՀՀ հատուկ քննչական ծառայությունում ստացված հաղորդման քննարկմամբ տեղեկություններ են ձեռք բերվել, որ ՀՀ քննչական կոմիտեի Շենգավիթի քննչական բաժնում քննվող քրեական գործի նախաքննության ընթացքում ոստիկանության աշխատակիցները  մեղադրյալ Գեւորգ Մ.-ի դեմ ցուցմունքներ կորզելու նպատակով սպառնալիքներ եւ ճնշումներ են գործադրել վկա Գայանե Խ.-ի նկատմամբ, իսկ  հետագայում վերջինիս մասնակցությամբ կատարված քննչական փորձարարության ընթացքում  քննիչն արձանագրել է  իրականությանը չհամապատասխանող տեղեկություններ:

ՀՔԾ մամուլի ծառայությունից հայտնում են, որ բացի այդ, ոստիկանության աշխատակիցներն  առանց թույլտվության  խուզարկել են Արմեն Թ.-ի ավտոմեքենան եւ թմրամիջոց հայտնաբերելուց հետո առանց արձանագրելու նրան ավտոմեքենայով տեղափոխել են ոստիկանության Էրեբունու բաժին, որտեղ հայտնաբերված թմրամիջոցը դրել են ավտոմեքենայի մեջ ու այդ մասին տեղեկացրել  վերջինիս: Այնուհետեւ հրավիրված  երկու  ընթերակաների ներկայությամբ Արմեն Թ.-ն  թմրամիջոցը  դուրս  է  բերել  ավտոմեքենայի միջից եւ հայտարարել, որ այն  իրեն  է տվել ոմն Գեւորգը:

Պաշտոնատար անձանց կողմից պաշտոնեական լիազորությունները չարաշահելու եւ պաշտոնեական կեղծիք կատարելու  դեպքի առթիվ ՀՀ քրեական օրենսգրքի 308-րդ եւ 314-րդ հոդվածների 1-ին մասերի հատկանիշներով հարուցվել է քրեական գործ:

Կատարվում է նախաքննություն: