Շուտով կլրանա Գյումրիի բախումների գործի նախաքննության 6 ամիսը, սակայն այն դեռ չի հանգուցալուծվել:  Այս մասին NEWS.am-ի թղթակցի հետ զրույցում ասաց գործի շրջանակներում մեղադրյալ Մնացական Ալեքսանյանի փաստաբան Հայկ Հարությունյանը:

Նա նշեց, որ նախաքննության 6 ամիսը լրանում է հուլիսի 15-ին, եթե մինչ այդ որեւէ գործողություն չանեն, ապա փաստաբանը միջնորդելու է, որ քրեական գործի վարույթը կարճեն, իսկ իր պաշտպանյալի նկատմամբ հետապնդումը՝ դադարեցնեն:

Նշենք, որ Մնացական Ալեքսանյանը Գյումրիի բախումների գործով ձերբակալված առաջին անձն էր: Մնացական Ալեքսանյանին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով, այն է՝  խուլիգանություն, որը զուգորդվել է անձի առողջությանը միջին ծանրության վնաս պատճառելով: Նրա նկատմամբ խափանման միջոց էր ընտրվել ստորագրություն չհեռանալու մասին:

Հիշեցնենք, որ բախումները տեղի էին ունեցել հունվարի 15-ին Գյումրիում ՌԴ հյուպատոսարանի շենքի առջեւ ոստիկանների եւ ցուցարարների միջեւ: Բախումներից հետո Գյումրիի հիվանդանոց էր դիմել 33 անձ, որոնցից 10-ը քաղաքացի, 23-ը՝ ոստիկան:

Բողոքի ակցիայի մասնակիցները պահանջում էին Հայաստանին հանձնել Գյումրիում հունվարի 12-ին Ավետիսյանների ընտանիքի 7 անդամներին սպանելու համար մեղադրվող Վալերի Պերմյակովին: