ԵԱՀԿ Մինսկի խմբի ամերիկացի  համանախագահ  Ջեյմս Ուորլիքը հերթական անգամ հանդես է եկել Արցախի հիմնախնդրի լուծման կողմնակալ հայտարարությամբ: Այս մասին հայտարարություն է տարածել ՍԴՀԿ «Սարգիս Տխրունի» ուսանողական-երիտասարդական միությունը:

Հայտարարությունում նաեւ ասվում է.

«Նա լրատվամիջոցների հետ զրույցում նշել է, թե հայկական կողմը պետք է «ազատի Ադրբեջանի օկուպացված տարածքները»:  Այս կապակցությամբ մենք ՝ հայ երիտասարդներս, հայտարարում ենք.

1. Արցախում չկա ոչ մի թիզ օկուպացված հող: Ավելին, Ադրբեջանն է, որ օկուպացրել է  հայկական Շահումյանի, Գետաշենի, Մարտունաշենի, Արծվաշենի շրջանները:

2. Ամերիկացի համանախագահի հայտարարությունը միակողմանի է, որում ներառված չէ Արցախի հիմնախնդրի խաղաղ լուծման հիմնական իրավունքը՝ Արցախի Հանրապետության միջազգային ճանաչումն իբրեւ անկախ եւ սուվերեն  պետություն:

3. ԵԱՀԿ Մինսկի խմբի համանախագահներն ըստ պատշաճի չեն արձագանքում այն ժամանակ, երբ Ադրբեջանի զինված ուժերի կողմից ամեն օր խախտվում  է հրադադարի ռեժիմը, որի հետեւանքով զոհվում են թե՛ զինվորականներ, թե՛ խաղաղ բնակչություն:

4. ԵԱՀԿ Մինսկի խմբի համանախագահ Ուորլիքը հանդես չեկավ  որեւիցե դատապարտող հայտարարությամբ, երբ Արցախի պետական տարածքում  ադրբեջանցի դիվերսանտները գազանաբար սպանեցին 17-ամյա խաղաղ բնակիչ Սմբատ Ցականյանին, ՀՀ ԶՈՒ սպայի եւ ծանր վիրավորեցին անզեն կնոջը:

5. ԵԱՀԿ Մինսկի խմբի համանախագահ Ուորլիքը չդատապարտեց այն փաստը, երբ Ադրբեջանում դաժանաբար սպանվեց խաղաղ բնակիչ,  պատահաբար այդ երկրի տարածքում հայտնված Կարեն Պետրոսյանը:

6. ԵԱՀԿ Մինսկի խմբի համանախագահ  Ուորլիքը եւ ԵԱՀԿ Մինսկի խումբն ընդհանրապես, համարժեք գնահատական չտվեցին Ադրբեջանի կողմից Արցախի ԶՈՒ ուղղաթիռը խոցելուն, որը զինադադարի կոպտագույն խախտում էր:

Ելնելով վերոնշյալից՝ կրկին մեկ անգամ արձանագրում ենք, Արցախում օկուպացված տարածքներ չկան, իսկ ԵԱՀԿ Մինսկի խմբի համանախագահի հայտարարությունը հեռու է կշռադատված եւ օբյեկտիվ լինելուց: