Վրաստան կատարած այցի երկրորդ օրը ՀՀ գյուղատնտեսության նախարար Սերգո Կարապետյանն այցելել է Վրաստանի Հանրապետության գյուղատնտեսության նախարարություն, որտեղ կայացել  է երկու երկրների գյուղնախարարների առանձնազրույցը:

Գյուղնախարարության մամուլի ծառայությունից հայտնում են, որ հանդիպման ընթացքում քննարկվել են երկկողմ հետաքրքրություն ներկայացնող հարցեր` Հայաստանի եւ Վրաստանի միջեւ գյուղատնտեսության բնագավառում հարաբերությունների ընդլայնման եւ  նոր ուղղություններով փոխգործակցության զարգացման շուրջ:

Կողմերը նշել են, որ անհրաժեշտ է  երկուստեք ջանքեր ներդնել  հատկապես ապրանքաշրջանառության ծավալների մեծացման եւ համատեղ ձեռնարկությունների ստեղծման ուղղությամբ` ընդգծելով առկա ներուժի առավելագույնս արդյունավետ իրացման կարեւորությունը:

Երկու հարեւան երկրների ագրարային ոլորտի պատասխանատուներն առանձնացրել են փորձի փոխանակման հնարավորությունները մասնավորապես ձկնաբուծության ոլորտում եւ «Եվրոպական հարեւանության գյուղատնտեսության եւ գյուղի զարգացման ծրագրի» (ENPARD) շրջանակում, որն ուղղված է  գյուղատնտեսության եւ գյուղական համայնքների կայուն եւ համապարփակ զարգացմանը:

Հանդիպման ավարտից հետո Սերգո Կարապետյանը եւ Օթար Դանելիան հանդես են եկել համատեղ մամուլի ասուլիսով:

Հայաստանի գյուղնախարարը, լրագրողների խնդրանքով անդրադառնալով համագործակցության ընդլայնման հեռանկարներին,  իր խոսքում հատկապես կարեւորել է գյուղացիական կոոպերատիվների խթանման, ապահովագրական համակարգի ներդրման ուղղություններով գործակցության զարգացման անհրաժեշտությունը:

Նախարարը հավելել է, որ Վրաստանի համար կարող է օգտակար լինել խաղողի սեղանի սորտերի աճեցման տեխնոլոգիաների, ինչպես նաեւ ջերմոցային տնտեսությունների զարգացման հայկական փորձը:

Առանձնահատուկ կարեւորվել է  փոխայցելությունների ակտիվացումը երկու հարեւան երկրների միջեւ ինչպես պաշտոնական մակարդակում, այնպես էլ մասնագիտական շրջանակներում:

Նախարարները եւս մեկ անգամ ընդգծել են ձեռներեցության խթանման կարեւորությունը համատեղ նոր ձեռնարկությունների ստեղծման ուղղությամբ` մատնանշելով հայ եւ վրացի գործարարների համատեղ ներդրումներով ստեղծված «Իխտիոսի» ձկնաբուծարանի հաջողված օրինակը:

Նախարար Կարապետյանն այցելել է նաեւ Վրաստանի սննդամթերքի անվտանգության գործակալություն եւ գիտական կենտրոն, ծանոթացել  իրականացվող աշխատանքներին:

Այնուհետեւ Սերգո Կարապետյանն իր վրացի պաշտոնակցի ուղեկցությամբ ուղեւորվել է Կախեթի, որտեղ այցելել է «Կինձմարաուլիս մարանի» գինեգործական ընկերություն,  «Մեխանիզատոր» ծառայությունների կենտրոն: