Հայաստանի եւ Լիբանանի արդարադատության նախարարությունների միջև համագործակցության զարգացման ուղղությամբ դեռ անելիքներ կան: Այս մասին, այսօր՝ փետրվարի 23-ին, ՀՀ-ում Լիբանանի Հանրապետության արտակարգ և լիազոր դեսպան Ժան Մաքարոնի հետ հանդիպման ժամանակ նշել է ՀՀ արդարադատության նախարար Արփինե Հովհաննիսյանը:

ԱՆ-ից NEWS.am-ին հայտնում են, որ կողմերը քննարկել են երկկողմ հետաքրքրություն ներկայացնող մի շարք հարցեր:

Արփինե Հովհաննիսյանը, դեսպանի հետ զրույցում բարձր գնահատելով Հայաստանի ու Լիբանանի միջև առկա հարաբերությունները և ձևավորված փոխվստահության մթնոլորտը, նշել է, որ դեռ անելիքներ կան երկու երկրների արդարադատության նախարարությունների միջև համագործակցության զարգացման ուղղությամբ:

Նախարարը կարևորել է արդարադատության ոլորտում փոխշահավետ համագործակցության խորացումը՝ պատրաստակամություն հայտնելով այդ ուղղությամբ ձեռնարկելու համապատասխան քայլեր:

Ժան Մաքարոնը, շնորհակալություն հայտնելով ընդունելության համար, համոզմունք է հայտնել, որ Արդարադատության նախարարությունը կարող է լինել լավ գործընկեր՝ առկա հարաբերություններն էլ ավելի խորացնելու համար: Դեսպանը նույնպես կարևորել է արդարադատության նախարարությունների միջև փոխգործակցության խթանումը և վստահեցրել, որ այդ ուղղությամբ կձեռնարկվեն համապատասխան քայլեր:

Հանդիպման ավարտին կողմերը պատրաստակամություն են հայտնել արդարադատության ոլորտում երկու երկրների միջև համագործակցությունը դարձնել առավել արդյունավետ: