նախընտրելի դարձնելՄիգրացիայի եւ քաղաքացիության հարցերով Եվրոպական հանձնակատար Դիմիտրիս Ավրամոպուլոսը կոչ է արել ԵՄ անդամ երկրներին հնարավորինս շուտ համաձայնության գալ Եվրամիությունում միգրացիայի բարեփոխումների շուրջ եւ ավելի մեծ համերաշխություն ցուցաբերել փախստականների ընդունման հարցում, հաղորդում է «ՏԱՍՍ»-ը `վկայակոչելով գերմանական Funke մեդիախումբը:
«Մենք չենք կարող ընդունել ստատուս-քվոն, երբ որոշ ԵՄ երկրներ ստիպված են ավելի մեծ պատասխանատվություն կրել, քան մյուսները», - ասվում է հայտարարության մեջ:
Ըստ Ավրամոպուլոսի՝ հետագա եվրոպական միգրացիոն քաղաքականությունը պետք է «արդար եւ հավասարակշռված» լինի: «Այսօր այն այդպիսին չէ»,- ասել է եվրահանձնակատարը: «Մենք բոլորս գիտենք, որ ժամանակ կորցնել չի կարելի»,- ասել է նա` նշելով, որ բարեփոխումների վերաբերյալ համաձայնությունները պետք է ձեռք բերվեն մինչեւ 2018 թվականի հունիսը:
«Միգրացիան հաջորդ տարիներին կարեւոր տեղ կզբաղեցնի Եվրոպայի եւ աշխարհի օրակարգերում», - ասել է Ավրամոպուլոսը: «Մենք չենք կարող նոր ճգնաժամի սպասել, որը մեզ կհիշեցնի այդ մասին»,-եզրափակել է նա:
