Հունիսի 11-ին, ժամը 3.10-ին, ոստիկանության Թալինի բաժին ահազանգ է ստացվել, որ ժամը 3.00-ի սահմաններում անհայտ անձը կոտրել է Արտենի համայնքի ծննդատան բուժամբուլատորիայի պատուհանի ապակին եւ դիմել փախուստի:

ՀՀ ոստիկանությունից NEWS.am-ին հայտնում են, որ ձեռնարկված միջոցառումների շնորհիվ ոստիկանության ծառայողները պարզել են, որ հանցագործությունը կատարել է 1960 թ. ծնված Գալուստ Գ.-ն, որը հունիսի 10-ից ոստիկանության Արմավիրի բաժնի կողմից որոնվում էր որպես անհայտ կորած:

Պարզվել է նաեւ, որ վերջինս հունիսի 11-ին, ժամը 1.00-ից մինչեւ 7.00-ն ընկած ժամանակահատվածում, 1977 թ. ծնված Արթուր Ք.-ի տան բակից փախցրել է նրա «Ֆորդ» մակնիշի ավտոմեքենան, որը հետո թողել է հիվանդանոցի բակում՝ վնասված վիճակում:

Այնուհետեւ փորձել է փախցնել Վլադիմիր Ն.-ին պատկանող «ԳԱԶ-53» մակնիշի ավտոմեքենան, սակայն նկատելով տիրոջը՝ փախցրել է հարեւանությամբ բնակվող՝ 1962 թ. ծնված Սամվել Զ.-ի «Զիլ» մակնիշի ավտոմեքենան, որն էլ մեքենայով հանդերձ ոստիկանության Թալինի բաժնի ծառայողների կողմից կանգնեցվել եւ բերման է ենթարկվել:

Կատարվում է քննություն: