նախընտրելի դարձնել
Ենթակառուցվածքների եւ զվարճությունների բացակայությունը թույլ չի տալիս Սեւանին հայտնի հանգստավայր դառնալ: Այս մասին NEWS.am- ի թղթակցի հետ զրույցում հայտնեց Rima Travel տուրիստական գործակալության տնօրեն Ռիմա Խաչատրյանը:
Ըստ նրա՝ Սեւանն ունի բոլոր հնարավորությունները՝ Հայաստանի ամենահայտնի զբոսաշրջային վայրը դառնալու համար, սակայն այստեղ տրամադրվող ծառայությունների ցածր որակի, չկազմակերպված ժամանցի պատճառով այն չի կարող մեծ տուրիստական հոսքեր գրավել:
«Լճում լողալուց հետո զբոսաշրջիկները չգիտեն՝ ինչով զբաղվել: Բացի դրանից, դեպի լիճը տանող ճանապարհների վիճակը եւս լավը չէ: Ես չեմ խոսում համատարած աղբի եւ աղտոտվածության մասին, որի համար տուօպերատորներն ու գիդերը հաճախ ստիպված են կարմրել զբոսաշրջիկների առջեւ»,- նշեց տուրիստական գործակալության ղեկավարը:
Նրա խոսքով՝ այսօր Հայաստանում զբոսաշրջիկների այցելությունների քանակով առաջին տեղում է Ծաղկաձորը, քանի որ Սեւանը լուսանցքից այն կողմ է մնացել, ոչինչ չի արվել, որպեսզի քաղաքը զարգանա եւ մոդայիկ հանգստավայր դառնալ:
«Հակառակ դեպքում, Սեւանը հետաքրքիր կլիներ ոչ միայն լողափնյա հանգստի սիրահարների համար, այլեւ՝ մշակութային եւ պատմական զբոսաշրջության կողմնակիցների: Ինչպես գիտեք, Սեւանը հարուստ պատմություն, բազմաթիվ լեգենդներ եւ առասպելներ ունի, իսկ Լճաշեն գյուղում բազմաթիվ պատմական հուշարձաններ են պահպանվել»,- հավելեց Ռիմա Խաչատրյանը:
