Ըստ «168 ժամ» թերթի, մերձիշխանական շրջանակներում շրջանառվող տեղեկությունների համաձայն, փետրվարի 7-ին տեղի ունեցած կոալիցիայի նիստում (որի մասին այդպես էլ որեւէ պաշտոնական հաղորդում չեղավ) Հայաստանի նախագահ Սերժ Սարգսյանը հայտարարության տեքստ է ներկայացրել ԲՀԿ ղեկավար Գագիկ Ծառուկյանին եւ առաջարկել է այն ստորագրել:

Ըստ այդ հայտարարության` նախ ԲՀԿ-ն պետք է հայտարարի, թե 2013թ. նախագահական ընտրություններում պաշտպանելու է Սերժ Սարգսյանի թեկնածությունը, իսկ 2012 թ. խորհրդարանական ընտրություններին ՀՀԿ-ի հետ մասնակցելու է միասնական ցուցակով: Ըստ նույն աղբյուրների, նշված հայտարարությունից հրաժարվելու դեպքում ԲՀԿ-ն պետք է դուրս գա կոալիցիայից: Ծառուկյանին հաջողվել է հայտարարության պատասխանը հետաձգել մինչեւ ուրբաթ, այսինքն` վաղը: Երեկ ՀՀԿ եւ ԲՀԿ խմբակցությունների պատգամավորները խուսափել են այս թեմայի շուրջ որեւէ մեկնաբանությունից:

Հիշեցնենք, որ տարբեր հրապարակումների համաձայն, անցած օրերին Գագիկ Ծառուկյանը գտնվել է Մոսկվայում, որտեղից վերադարձել է երեկ երեկոյան: Շաբաթվա սկզբին Մոսկվայում է եղել նաեւ նախկին նախագահ Ռոբերտ Քոչարյանը: Որոշ տեղեկությունների համաձայն, վերջինս հանդիպել է ՌԴ վարչապետ Վլադիմիր Պուտինի հետ: Այսինքն` չի բացառվում, որ Սերժ Սարգսյանի ներկայացրած հայտարարությունը ստորագրելու կամ մերժելու հարցը որոշվելու է հենց Մոսկվայում: