ԱՄՆ նախագահ Դոնալդ Թրամփը, ինչպես երեւում է, համաձայն չէ Հյուսիսային Կորեային եւ  «Իսլամական Պետությանը» տրված հետախուզական հանրակցության գնահատականների հետ:

Թվիթների շարքի մեջ Թրամփը նշել է, որ Իսլամական Պետությունը «շուտով կոչնչացվի», իսկ Փհենյանի հետ առկա է «ապամիջուկայնացման արժանապատիվ  հնարավորություն»:

 «Երբ ես նախագահ դարձա,  ԻՊ-ն դուրս եկավ Սիրիայում վերահսկողությունից եւ դարձավ անզսպելի: Այդ ժամանակից ի վեր հսկայական առաջընթաց է գրանցվել, հատկապես վերջին 5 շաբաթվա ընթացքում: Խալիֆաթը շուտով կկործանվի, ինչն անհավանական էր թվում երկու տարի առաջ», - գրել է նա:

Մեկ այլ թվիթում Թրամփը նշել է, որ ԱՄՆ-ի եւ Հյուսիսային Կորեայի միջեւ հարաբերություններն առավել քան լավ են: «Ոչ մի փորձարկում (հրթիռների), աճյունների փոխանցում (Կորեական պատերազմի ընթացքում սպանված ամերիկյան զինվորականների՝ խմբ․), պատանդների վերադարձ», - գրել է նա:

«Ժամանակը ցույց կտա, թե ինչ կլինի Հյուսիսային Կորեայի հետ, բայց նախորդ վարչակազմի օրոք հարաբերությունները սարսափելի էին եւ շատ շուտով  շատ վատ բաներ էին տեղի ունենալու: Այժմ բոլորովին այլ պատմություն է: Ես անհամբերությամբ եմ սպասում  առաջիկայում Կիմ  Չեն Ընի հետ հանդիպմանը: Ձեռք բերվա առաջընթացը մեծ տարբերություն է»:

Նախօրեին Ազգային հետախուզության տնօրեն Դեն Քոութսը ներկայացրել էր ԱՄՆ հետախուզական հանրության կողմից պատրաստված զեկույցը՝ գլոբալ սպառնալիքների մասին: Վերջինիս մեջ նշվում էր, որ Հյուսիսային Կորեան հազիվ թե հրաժարվի իր միջուկային զենքից: Ինչ վերաբերում է «Իսլամական Պետությանը», Քոութսը հայտարարել էր, որ ԻՊ-ն շարունակելու է Սիրիայից եւ Իրաքից հարձակումները տարածաշրջանային եւ արեւմտյան հակառակորդների, ներառյալ ԱՄՆ-ի դեմ: