Մի քանի կարճամետրաժ ֆիլմերի հեղինակ, ստամբուլաբնակ երիտասարդ կինոռեժիսոր Լուսին Դինքը կնկարահանի Վիլյամ Սարոյանին նվիրված ֆիլմ`  «Ճանապարհորդություն Բիթլիս» վերնագրով:

Ինչպես NEWS.am-ը տեղեկանում է «Ոսկե ծիրան» կինոփառատոնի մամլո կենտրոնից, նախագիծը հաղթող է ճանաչվել եւ Եվրասիա համագործակցության հիմնադրամի սահմանած  30 000 դոլար մրցանակին արժանացել ապրիլի 11-13-ը Ստամբուլում տեղի ունեցած Հայաստան-Թուրքիա կինոպլատֆորմի շրջանակներում անցկացած Վավերագրական ֆիլմերի աջակցությանն ուղղված հանդիպմանը: Անադոլու Քյուլթուրի` «Ոսկե ծիրան» կինոփառատոնի հետ համագործակցությամբ կազմակերպած աշխատանքային հանդիպմանը ներկայացվել էին 30-ից ավել նախագծեր Թուրքիայից եւ Հայաստանից, որոնցից ընտրվել եւ բուն հանդիպմանը քննարկվել են ութը` չորս հայկական եւ չորս թուրքական:  

Լուսին Դինքի` Հրանտ Դինքի եղբոր աղջկա ֆիլմը կներկայացնի 1964 թվականին Վիլյամ Սարոյանի Բիթլիս կատարած ուղեւորությունը: Նա 11 տարի անց հարցազրույցներից մեկի ժամանակ անդրադարձել էր այդ ուղեւորությանը, հիշել Բիթլիսը` ասելով, որ «քաղաքը աներեւակայելի է եւ վեր է նրանից, թե ինչպիսին էի այն պատկերացանում: Բայց այն մերը չէ: Այն մերն է, բայց պատկանում է ուրիշներին… Սարոյանները հոս են, ուսկի՞ց եկան»:

Ըստ գաղափարի` կինոխցիկը պետք է հետեւի այն ճանապարհին, որը Սարոյանը անցել է մինչեւ Բիթլիս եւ ցույց տա արխիվային լուսանկարներ, նյութեր եւ այսօրվա Բիթլիսը: Կլինի Սարոյանի երկու պատմվածքների բեմադրում, եւ վերջում նրա բոլոր հերոսները կհավաքվեն մեկ հարկի տակ`անիմացիայի միջոցով: Նախատեսվում է համագործակցություն հայ անիմատորների հետ:

Նախագծի պրոդյուսերը համշենահայ ռեժիսոր, «Ոսկե ծիրան» կինոփառատոնի մրցանակակիր Օզջան Ալփերի եղբայրն է` Սոներ Ալփերը:

Երկրորդ մրցանակին արժանացել է Արթուր Բախտամյանի «Ճանապարհոդություն Նոր տարվա նախօրյակին» նախագիծը: Այն Անադոլու Քյուլթուրի կողմից ստացել է տեխնիկական աջակցություն եւ երկու հազար դոլար: Նախագիծը 90 տոկոսով կֆինանսավորի թուրքական կողմը:

«Ոսկե ծիրան» կինոփառատոնը նույնպես ցույց կտա տեխնիկական աջակցություն ֆիլմի ստեղծման համար:

Աշխատանքային հանդիպմանը զուգահեռ Ստամբուլի միջազգային կինոփառատոնի շրջանակներում տեղի ունեցավ Հայ-թուրքական կինոպլատֆորմի նկարահանած 5 կարճամետրաժների համաշխարհային պրեմիերան: Ցուցադրվեցին  Դիանա Կալդումյանի «Գալաթա», Չանայ Օզդենի «Տիկնիկային թատրոն», Գյուլենգյուլ Ալթինթասի «Մի կորեք, երեխաներ», Արթուր Սուքիասյանի «Աղավնիների վարպետը» եւ Գոռ Բաղդասարյանի «Հարեւաններ» ֆիլմերը:

Հայ երիտասարդ ռեժիսորները, վերադառնալով Ստամբուլից, պատմում էին, որ հանդիսատեսը զարմանալիորեն դրական էր տրամադրված, եւ արձագանքները շատ էին թե’ բուն ցուցադրության ընթացքում, թե’ դրանից հետո կազմակերպված երեկույթի ժամանակ:  

Հանդիսատեսի շարքում էին Թուրքիայի առաջատար եւ հեղինակավոր ռեժիսորներ  Եշիմ Ուստաողլուն եւ Սեմիհ Կապլանողլուն: Ծրագիրը արժանացել է նրանց հավանությանը, եւ մի շարք փառատոնների ներկայացուցիչներ նույնպես բարձր են գնահատել նախագիծն ու վերցրել են սկավառակներն իրենց հետ: