Առողջապահության նախարար Հարություն Քուշկյանը մայիսի 18-ին այցելել է Գյումրիում կառուցվող նոր բժշկական կենտրոն, որի շինարարության նախագիծը նախկինում իրեն դուր չէր եկել: Այս մասին NEWS.am-ի թղթակցի հետ զրույցում ասաց Առողջապահության նախարարի մամուլի քարտուղար Շուշան Հունանյանը:

Հիշեցնենք, որ դեռեւս ապրիլի 6-ին Հարություն Քուշկյանն այցելել էր Գյումրի եւ ծանոթանալով  նոր բժշկական կենտրոնի շինարարությանը, հայտարարել էր, որ իրեն դուր չի եկել նոր կառուցվող բժշկական կենտրոնի  նախագիծը, եւ հրահանգել էր, որ  այն պետք է ենթարկվի փոփոխության: Մասնավորապես նախարարը նշել էր, որ կառուցվող հիվանդանոցը պետք է սպասարկի ե’ւ մեծահասակներին ե’ւ մանկահասակներին: Նոր կառուցվող բազմաֆունկցիոնալ հիվանդանոցը  200 մահճակալ հզորությամբ  է լինելու, ուր տեղակայվելու են Գյումրիի Գյուլբենկյանի անվան  Վիրաբուժական, «Սամարիթեր» եւ Մարզային  հիվանդանոցները:

Այսօրվա այցի ժամանակ նախարարը կրկին այցելել է շինարարության վայր եւ տեսել, որ իր նշած փոփոխությունները կատարվել են նախագծում: Շուշան Հունանյանի խոսքով` Հարություն Քուշկյանը նոր հանձնարականներ է  տվել, որոնք միտված են բժշկական սպասարկման որակի բարձրացմանը եւ ժամանակին հիվանդանոցը շահագործման հանձնելուն:

Նշենք, որ բժշկական կենտրոնը կառուցվում է Համաշխարհային բանկի եւ կառավարության միջեւ կնքված պայմանագրի շրջանակներում:  Նախատեսված է` շինարարությունը ավարտել 2012թ:  Ծրագրվել է նաեւ նման բժշկական կենտրոններ կառուցել նաեւ տարբեր մարզերում: