նախընտրելի դարձնել
Հոռետեսորեն եմ վերաբերվում ներկայիս իշխանությունների հայտարարություններին այն մասին, թե իրենք չեն պատրաստվում կեղծել ընտրությունների արդյունքները: Այս մասին փետրվարի 10-ին լրագրողների հետ հանդիպմանը հայտարարեց քաղաքագետ Թեւան Պողոսյանը:
Պողոսյանը հիշեցրեց, որ նույնիսկ ղարաբաղյան առաջին պատերազմում հաղթած Հայաստանի նախագահ Լեւոն Տեր-Պետրոսյանն է կեղծել ընտրությունների արդյունքները, ուստի պարտված պատերազմի դեպքում երաշխիքներ առավել եւս չեն կարող լինել:
Ըստ նրա` հայ հասարակությունը տեղի ունեցածի հետեւանքները գիտակցելու փուլում է, իսկ Հայաստանի շահերին վնասող գործողությունները սկսվել են նոյեմբերի 9-ին, երբ իշխանությունները չցանկացան խաղաղ հեռանալ եւ նոր հնարավորություններ բացել երկրի համար:
«Այս ամենը հանգեցնում է նրան, որ ամեն օր նոր փաստեր են բացահայտվում, ընդ որում` տեղեկատվական մանիպուլյացիաների նկատմամբ թուլացած հանրային «իմունիտետի» ֆոնին: Բազմաթիվ հակասություններ կան Ղարաբաղի Պաշտպանության բանակի ենթադրյալ կազմալուծման կամ անձնակազմի կրճատման վերաբերյալ տեղեկատվության վերաբերյալ: Այս ամենի ֆոնին առաջ է քաշվում այն թեզը, որ անվտանգության երաշխիքը մենք չենք ապահովում»,- հավելեց Պողոսյանը:
Քաղաքագետը նշեց, որ իշխող ուժը պետք է գիտակցի իր հեռանալու անհրաժեշտությունը եւ հեռանա, նոր բանակցող է անհրաժեշտ, որը կաշկանդված չի լինի, անհրաժեշտ է վստահության մթնոլորտ ձեւավորել, կարեւոր է այնպիսի համակարգ կառուցել` մեկ անձից կախվածությունից ազատվելու համար: «Այսօր քննարկումները տարվում են կրկին ոչ թե գաղափարների եւ ինստիտուտների շրջանակներում, այլ` անհատների շուրջ: Օրինակ, վախ են սերմանում Հայաստանի երկրորդ նախագահ Ռոբերտ Քոչարյանի` քաղաքականություն վերադառնալու կապակցությամբ:
Այսինքն` հայ հասարակությունը վախենու՞մ է հայերից: Մենք չենք վախենում, որ մեր անվտանգությունը գուցե մենք չենք երաշխավորվում, եւ միեւնույն ժամանակ վախենում ենք, որ մեր հայրենակի՞ցը կարող է լինել պետության ղեկին: Այսպիսի ծայրահեղությունները շատ վտանգավոր են: Եթե Քոչարյանի նկատմամբ դատավճիռ չլինի, ապա նա 3 միլիոն մարդկանցից մկեն է, ով կարող է օգտվել քաղաքական թիմ ստեղծելու եւ ընտրությունների գնալու հնարավորությունից: Դա իր որոշելիքն է: Եթե մարդիկ գնան նրա հետեւից եւ տան իրենց ձայնը, ուրեմն մարդիկ վստահում են նրան»,- ընդգծեց փորձագետը:
Ընդհանրապես, ըստ Թեւան Պողոսյանի, հասարակությունն այժմ պատրաստ չէ ընտրությունների, քանի որ դրանք անցկացվելու են էմոցիոնալ ֆոնին, որոշումը գիտակցված չի լինելու. նույնը եղավ, երբ ներկայիս իշխանությունները որոշեցին ընտրություններ անցկացնել էյֆորիայի ֆոնին, այսինքն` նորից էմոցիաների վրա: «Այժմ անհրաժեշտ է ժամանակավոր կառավարություն ստեղծել, որը ոչ մի բանի չի հավակնի, եւ որոշ ժամանակ անց արդեն ընտրություններ անցկացնել: Սակայն ամենից առաջ ներկայիս իշխանությունները պետք է քաղաքական կամք ցուցաբերեն, վերցնեն գրիչը եւ հրաժարականի դիմում գրեն»,- բացատրեց նա:
Փորձագետն ընդգծեց քաղաքական կոնսենսուսի ձեւավորման կարեւորությունը` ճգնաժամի հետագա խորացումից խուսափելու համար, ինչպես նաեւ` ազգային օրակարգի ձեւավորման կարեւորությունն այնպիսի հարցերի շուրջ, ինչպիսիք են Ղարաբաղի անկախության ճանաչման անհրաժեշտությունը եւ Հայաստանի կողմից դրա լիակատար աջակցությունը:
«Բացի այդ, հասարակությունը պետք է գիտակցի, որ եթե, օրինակ, չի ցանկանում այսօր իր որդիներին Ղարաբաղ ուղարկել, ապա վաղը չի ցանկանա ուղարկել Սյունիք, Արարատ, Տավուշ եւ այլն: Թշնամին չի փոխվել` որտեղ էլ որ լինի»,- եզրափակեց քաղաքագետը:
