Մենք պահանջում ենք ՀՀ վարչապետի եւ ամբողջ կառավարության հրաժարականը՝ հուսալով, որ ստեղծված իրավիճակում պատերազմում պարտված եւ հասարակության վստահությունը կորցրած կառավարության ղեկավարը կհեռանա: Համապատասխան ուղերձը մարտի 16-ին Երեւանի ավագանու նիստին «Լույս» խմբակցության անունից հղեց դրա ղեկավար Դավիթ Խաժակյանը:
Ըստ նրա՝ նախարարի կաբինետի ղեկավարի պաշտոնաթողությունից հետո խորհրդարանը վարչապետ  կընտրի, որը անցումային կառավարություն կձեւավորի, կկայունացնի իրավիճակը եւ կամրապնդի ներքին անվտանգությունն ու համերաշխությունը հասարակության մեջ:

«Բացի այդ, հիմք կստեղծվի արտահերթ խորհրդարանական ընտրություններ ողջամիտ ժամկետում անցկացնելու համար»,- ընդգծեց Խաժակյանը:

Նա նշեց, որ ներկայիս ճգնաժամի մեղավորը Փաշինյանն ու իշխող «Իմ քայլը» դաշինքն է:

«Համոզված եմ, որ ներկայիս իշխանությունները կեղծելու են ընտրությունները, քանի որ նրանք միշտ արել են իրենց ասածի հակառակը: Նրանք չեն կարող երաշխավորել, որ ընտրությունները կլինեն ազնիվ եւ արդար, ուստի Փաշինյանն ու իր թիմը պետք է հրաժարական տան մինչ խորհրդարանական արտահերթ ընտրությունների անցկացումը»,- հավելեց Խաժակյանը:

«Բարգավաճ Հայաստան» կուսակցության խմբակցության ղեկավար Միքայել Մանրիկյանը պարզաբանեց, որ կապիտուլյացիայի ստորագրումից հետո երկրում գործընթացներն իներցիայով են ընթանում:

«Կապիտուլյացիոն ակտը ստորագրած մարդը չի կարող ղեկավարել երկիրը: Փաշինյանը «ֆեյքերի» վրա հիմնված երկիր կառուցեց, ինչի արդյունք դարձավ Արցախի 75 տոկոսի կորուստը: Նախկին կառավարության օրոք մենք մեզ ապահով էինք զգում: Մենք չէինք վախենում գնալ Արցախ եւ Հայաստանի Սյունիքի մարզ: «Բարգավաճ Հայաստան» կուսակցության խմբակցությունը միանում է «Լույս» խմբակցության ուղերձին»,- ասաց նա:

Ընդդիմության ՝ Փաշինյանի հրաժարականի պահանջը վիճաբանություն առաջացրեց ավագանու ներկայացուցիչների միջեւ: