նախընտրելի դարձնելՍոցիալ-դեմոկրատ Հնչակյան կուսակցությունը հանդես է եել հայտարարությամբ, որտեղ անդրադառնում է Երեւանի ու Վանաձորի դիմագիծն աղճատող շինարարական «բեսպրեդելին»:
Ստորեւ NEWS.am-ը ներկայացնում է հայտարարությունը.
«Վերջին տասնամյակի ընթացքում անընդհատ ականատես ենք եղել թե ինչպես են Թամանյանական Երեւանը այլասեռել:
Իշխանությունների ընչաքաղցությունը, անճաշակությունը, գավառամտությունը, ուղղակի տմարդի մոտեցումը հանգեցրեց նրան, որ ազգովի կորցրեցինք Երեւանի յուրահատուկ պայծառ դիմագիծը:
Պարոնայք իշխանավորները Երեւանից վրեժխնդիր լինելուց հետո անցել են Վանաձորի կենտրոնական հրապարակին:
Ա. Թամանյանի նախագծով կառուցված այս համալիրը լավագույններից մեկն է մեր տարածաշրջանում, որտեղ այժմ շինարարական աշխատանքներ են իրականացվում: Անսամբլի մեջ գտնվող հյուրանոցային շենքին անճոռնի կցոն են ավելացնում, որը ուղիղ հրապարակի տարածք է մխրճվում, խեղաթյուրելով, անտրամաբանական դարձնելով ողջ համալիրը:
Այս արդեն` անգրագիտությանը, տգիտությանը, ոխակալությանը վերագրել չի կարելի: Մենք ազգովի հայտնվել ենք մի երկրում, որտեղ համամարդկային տարրական օրենքները ոտնահարվում են, ճարտարապետականի մասին խոսելն ավելորդ ենք համարում: Օտար բառով ասած «բեսպրեդել» է տիրում ՀՀ տարածքում:
Պարոնայք վայ իշխանավորներ սթափվեք, վաղը այս ամենի համար պատասխանատվության եք ենթարկվելու»:
