Ուկրաինայի քաղաքացի Մարինա Չոբանյանին ձերբակալել   են  Բաթումում «ռուսական նավի» դեմ ցույցի ժամանակ, նա շարունակում է մնալ մեկուսարանում։ Վերջին տվյալներով նրան  տեղափոխել են Օզուրգեթիի քննչական մեկուսարան, տեղեկացնում է  «Նովոստի-Գրուզիան»։  

Ազատություն ռադիոկայանի վրացական ծառայության հաղորդմամբ,  ժամանակավոր պահման վայրում Մարինան իրեն վատ է զգացել։ Նրան որոշ ժամանակով տեղափոխել են տեղի հիվանդանոց,  հետո վերադարձրել մեկուսարան: Բժիշկներն ախտորոշել են խուճապային գրոհ։

Աղջիկը Վրաստան է տեղափոխվել 2022 թվականի սկզբին՝ Ուկրաինա Ռուսաստանի լայնամասշտաբ ներխուժումից անմիջապես առաջ։ Նրա հայրը՝ Վրաստանից էր, մահացել է մի քանի տարի առաջ։

ՆԳՆ-ն, ընդհանուր առմամբ, հաստատել է 23 մարդու ձերբակալում, որ կատարվել է Սոչիից ռուս զբոսաշրջիկներով Astoria Grande նավի ժամանման դեմ բողոքի ցույցի ժամանակ։ Նրանք մեղադրվում են մանր խուլիգանության և ոստիկանությանը չենթարկվելու մեջ։

Երիտասարդ իրավաբանների ասոցիացիան կոչ է արել Քննչական ծառայությանը արձագանքել ոստիկանության կողմից ուժի հնարավոր գերազանցմանը։

Հանրային պաշտպանը ևս դիմել է   քննչական ծառայությանը․. նա  ոստիկանության կողմից հոգեբանական և ֆիզիկական բռնության դեպք է արձանագրել բերման ենթարկվածներից մեկի նկատմամբ։