նախընտրելի դարձնել
Թուրքիայի նախագահ Ռեջեփ Թայիփ Էրդողանը կիրակի մեկօրյա այցով մեկնել է Բուդապեշտ, տեղեկացնում է Daily Sabah-ը։
Նախարարների պատվիրակության ուղեկցությամբ Էրդողանը կմասնակցի Հունգարիայի հիմնադրման օրվա տոնակատարություններին և կհետևի Հունգարիայում անցկացվող աթլետիկայի աշխարհի առաջնության մրցումներին, որին մասնակցում են թուրք մարզիկները։ Էրդողանը Հունգարիայի վարչապետ Վիկտոր Օրբանի՝ իր մտերիմ ընկերոջ, հյուրերի թվում է։
Այցի ընթացքում Էրդողանը և Օրբանը կքննարկեն երկկողմ հարաբերությունների բոլոր տեսանկյունները, ինչպես նաև տարածաշրջանային և միջազգային այլ խնդիրներ:
Սպասվում է, որ Էրդողանը զուգահեռ բանակցություններ կվարի նաև այլ գործընկերների, այդ թվում՝ Սերբիայի նախագահ Ալեքսանդր Վուչիչի հետ, որը ևս կմասնակցի տոնակատարություններին և միջոցառումներին։ Ակնկալվում է նաև, որ տոնակատարություններին ու միջոցառումներին կմասնակցեն նաև Քաթարի էմիրը և Ադրբեջանի, Ղրղզստանի, Ուզբեկստանի և Թուրքմենստանի նախագահները, ինչպես նաև Բոսնիա և Հերցեգովինայի բարձրաստիճան պաշտոնյաներ։
Էրդողանին ուղեկցում են արտաքին գործերի նախարար Հաքան Ֆիդանը, էներգետիկայի և բնական պաշարների նախարար Ալփարսլան Բայրաքթարը, երիտասարդության և սպորտի նախարար Օսման Աշքին Բաքը, արդյունաբերության և տեխնոլոգիաների նախարար Մեհմեդ Ֆաթիհ Քաջըրը, առևտրի նախարար Օմեր Բոլաթը, Նախագահի հաղորդակցության մարմնի ղեկավար Ֆահրեթթին Ալթունը և նախագահի գլխավոր խորհրդական Ակիֆ Չաղաթայ Քըլըչը։
Իր հերթին ադրբեջանական լրատվամիջոցները հայտնում են Իլհամ Ալիևի Հունգարիա կատարած այցի մասին։
Ըստ հաղորդագրության, Ալիևը օգոստոսի 20-ին Բուդապեշտում հանդիպել է Հունգարիայի վարչապետ Վիկտոր Օրբանի հետ։
Ուրբաթ օրը պետական ռադիոյին տված հարցազրույցում Օրբանը հրավիրված ղեկավարներին անվանել է «Հունգարիայի քաղաքական ընկերներ» և ասել, որ աթլետիկայի առաջնությունը կդառնա «ամբողջ աշխարհից, ներառյալ Չինաստանից, գործարար մարդկանց հետ երկկողմանի հանդիպումների և բանակցությունների համաժողով»:
