նախընտրելի դարձնել
Ուկրաինայի անվտանգության ծառայությունը (ՈՒԱԾ) հետախուզում է հայտարարել ռուս օլիգարխ Միխայիլ Ֆրիդմանի նկատմամբ։ Հետախուզման քարտը հայտնվել է Ուկրաինայի ՆԳՆ կայքում։
Ֆրիդմանը հետախուզվում է որպես կասկածյալ «մի խումբ անձանց կողմից նախնական դավադրության արդյունքում սահմանադրական կարգը բռնությամբ փոխելու կամ տապալելու կամ պետական իշխանությունը զավթելու, Ուկրաինայի տարածքի կամ պետական սահմանի փոփոխությունների նպատակով իրականացված գործողությունների ֆինանսավորման» (Ուկրաինայի քրեական օրենսգրքի 110-2-րդ հոդվածի 3-րդ մաս) գործով։ Սույն հոդվածով նախատեսված առավելագույն պատիժը 8 տարի ազատազրկումն է՝ գույքի բռնագրավմամբ։
Ըստ ՈՒԱԾ-ի, Ռուսաստանի լայնամասշտաբ ներխուժման սկզբից ի վեր Ֆրիդմանը մոտ երկու միլիարդ ռուբլի է «լցրել» Ռուսաստանի Դաշնության մի քանի ռազմական գործարաններ: «Դրանց թվում են Տուլայի փամփուշտների գործարանը, ինչպես նաև Յալամովի անվան Ուրալի օպտիկամեխանիկական գործարանը, որը բարձր տեխնոլոգիական սարքավորումներ է արտադրում ռուսական ռազմական ինքնաթիռների և ուղղաթիռների համար»,- ասվում է գերատեսչության հաղորդագրության մեջ։
Ըստ ՈՒԱԾ-ի, Ֆրիդմանը օգտագործել է իր կողմից վերահսկվող Alfa Group-ի ակտիվները և իր սեփական ռեսուրսները ««Ռուսաստանի բանակ» ապրանքային նշանով չոր սննդաբաժինների, հագուստի և այլ ապրանքների զանգվածային բաշխման համար, որը մատակարարվել է օկուպանտներին առաջնագծում» Նաև գործարարի կառույցները «ստանձնել են ռազմական տեխնիկայի և ռազմաճակատում ռուս զավթիչների կյանքի և առողջության ապահովագրությունը»։
Գերատեսչությունը պնդում է, որ Ֆրիդմանն ինքը «ապահովել է սեփական հեռահաղորդակցության ձեռնարկության և ԱԴԾ-ի համագործակցությունը» օկուպացված տարածքներում, ինչպես նաև, իբր, «կազմակերպել է նյութատեխնիկական օգնության հավաքագրում օկուպացիոն խմբերի կարիքների համար»:
