Թուրքիայի խորհրդարանը հուլիսի 29-ին հավանություն է տվել օրինագծի որոշ հատվածներին, որոնք, ըստ կենդանիների իրավունքների պաշտպանների, թույլ կտան երկրի թափառող շների մի մասի զանգվածային սպանությունը:

Ինչպես հաղորդում է AFP-ն, Թուրքիայի Ազգային մեծ ժողովը հուլիսի 28-ին սկսել է քննարկել թափառող շների թվաքանակը կարգավորող օրինագծի 17 հոդվածները։ Հուլիսի 29-ին նրանք հաստատել են օրինագծի առաջին հինգ հոդվածները։

Օրինագծի 5-րդ հոդվածի համաձայն՝ թափառող շները էվթանազիայի են ենթարկվելու, եթե դրանք «վտանգ են ներկայացնում մարդկանց և կենդանիների կյանքին կամ առողջությանը, դրսևորում են անվերահսկելի բացասական վարքագիծ, տառապում են վարակիչ կամ անբուժելի հիվանդություններով, կամ եթե նրանց որդեգրումն արգելվում է»։

Թուրք օրենսդիրները օրինագծի նոր տարբերակից հանել են շների էֆթանազիայի մասին կետը՝ հասարակության վրդովմունքի պատճառով։ Բայց նշվում է անասնաբուժական ծառայությունների մասին օրենքը, որն ընդհանրապես արգելում է էֆթանազիան, բայց որոշ դեպքերում թույլ է տալիս։

Օրինագծով առաջարկվում է նաեւ զանգվածաբար բռնել թափառող կենդանիներին, տեղափոխել ապաստարաններ եւ տալ ընտանիքներին։ Սակայն քննադատներն ասում են, որ փողոցներում չափազանց շատ շներ կան, որպեսզի նրանց բոլորին տեղավորեն ապաստարաններում և տեղավորեն ընտանիքներում:

Կենդանիների իրավունքների թուրք պաշտպանները պնդում են, որ փաստաթուղթը կենդանիների զանգվածային ոչնչացման պատրվակ է և փոխարենը հանդես են գալիս թափառող շների ստերիլիզացման օգտին։ 

Նրանք հղում են անում 1910 թվականի ողբերգությանը, երբ Օսմանյան կայսրության իշխանությունները Ստամբուլից 60 հազար թափառող շների տարան Մարմարա ծովի ամայի կղզի, որտեղ նրանք կրծում էին միմյանց։