Հյուսիսային Կորեան բավականաչափ քանակությամբ ուրան է հարստացրել ռումբերի «երկնիշ» քանակություն ստեղծելու համար եւ փորձում է հասնել առաջընթացի ավելի հզոր եւ ճշգրիտ հրթիռներ ստեղծելու ջանքերում՝ ուղղված Հարավային Կորեայի հետ մրցակցությանը, հինգշաբթի օրենսդիրներին կայտնել է Հարավային Կորեայի հետախուզական գործակալությունը, տեղեկացրել է Associated Press-ը։

Դռնփակ ճեպազրույցը, որը կազմակերպել էր Ազգային հետախուզական ծառայությունը, տեղի է ունեցել ուրանի արտադրության գաղտնի օբյեկտը դիտելուց հետո այս ամսվա սկզբին, երբ Կիմ Չեն Ընը հաստատել է իր միջուկային զենքի պաշարներն ավելացնելու նպատակի մասին։

Ճեպազրույցին ներկա օրենսդիր Լի Սոն Քվեունի խոսքով՝ հարավկորեական գործակալությունը եկել է այն եզրահանգման, որ Կիմի կողմից օբյեկտի բացահայտումը, հավանաբար, Վաշինգտոնին չհնազանդվելու հայտարարություն էր ԱՄՆ նախագահական ընտրությունների շեմին եւ նպատակ ուներ ցուցադրել իր ռազմական ձեռքբերումները երկրի ներսում, տնտեսական խորացող պայքարի ֆոնին։

Պատասխանելով հյուսիսկորեական ռումբերի վառելիքի պաշարների մասին հարցին՝ գործակալությունը տեղեկացրել է, որ Հյուսիսային Կորեան, հավանաբար, ունի մոտ 70 կիլոգրամ պլուտոնիում եւ բավականաչափ քանակությամբ զինական նպատակներով կիրառելի ուրան, որը բավական կլինի «երկնիշ» քանակությամբ զենք ստեղծելու համար, ասել է Լին։

Թեեւ Հյուսիսային Կորեայի պետական ԶԼՄ-ները չեն բացահայտել ուրանի հարստացման օբյեկտի գտնվելու վայրը, որը երկրի առաջնորդն այցելել է սեպտեմբերի 13-ին, հարավկորեական գործակալությունը տեղեկացրել է, որ դա, ամենայն հավանականությամբ, օբյեկտ է Քինգսթոնում, Հյուսիսային Կորեայի մայրաքաղաք Փհենյանից ոչ հեռու, ասել է ճեպազրույցին ներկա մեկ այլ օրենսդիր՝ Փաք Սուն Վոնը։