նախընտրելի դարձնել
Ճապոնիան զորքեր կուղարկի ԱՄՆ ծովային հետևակի և ավստրալական զորքերի հետ Ավստրալիայի հյուսիսում համատեղ զորավարժությունների համար, կիրակի հայտարարել են երկրների պաշտպանության նախարարները՝ մտահոգություն հայտնելով «Չինաստանի ագրեսիվ զինվորականների հետ բախումների հաճախակի դառնալու կապակցությամբ», հաղորդում է Associated Press-ը:
Ավստրալիայի պաշտպանության նախարար Ռիչարդ Մարլզը Դարվինում բանակցությունների համար ընդունել է իր ամերիկացի և ճապոնացի գործընկերներ Լլոյդ Օսթինին և Նակատանի Գենին։
Նախարարները հայտարարել են 2025 թվականից Հյուսիսային Ավստրալիայում Ավստրալիայի, Ճապոնիայի և ԱՄՆ ծովային հետևակի ռոտացիոն ուժերի միջև եռակողմ դեսանտային զորավարժությունների անցկացման մասին, որը սկսվելու է Talisman Sabre զորավարժություններով:
Ավստրալիան նաև հաջորդ տարի առաջին անգամ կմիանա Ճապոնիայում Exercise Orient Shield զորավարժություններին:
Համատեղ հայտարարության մեջ ընդգծվել է Արևելյան և Հարավչինական ծովերում ապակայունացնող գործողությունների առիթով եղած «լուրջ մտահոգությունը», այդ թվում՝ չինացի զինվորականների «վտանգավոր վարքագիծը» Ֆիլիպինների և տարածաշրջանի այլ նավերի նկատմամբ: Նախարարները նաև շեշտել են Թայվանի նեղուցի երկու կողմերում խաղաղության և կայունության կարևորությունը։
Անկախության ձգտող Թայվանը Չինաստանի միջազգայնորեն ճանաչված տարածքն է, սակայն արևմտյան երկրները Միացյալ Նահանգների գլխավորությամբ խրախուսում են Թայվանի անկախության ձգտումը՝ զինելով նրան, ինչը գրգռում է Պեկինին:
