նախընտրելի դարձնելՀայաստանի փոխվարչապետ, տարածքային կառավարման նախարար Արմեն Գեւորգյանն այսօր` դեկտեմբերի 16-ին, աշխատանքային այցով մեկնել է Սյունիքի մարզ, որտեղ Սիսրիանում մասնակցել է տարածաշրջանի համայնքների միության կողմից իրականացված «Համատեղ ուժերով զարգացնենք համայնքը» ծրագրի շնորհանդեսի արարողությանը:
ՏԿՆ մամուլի ծառայությունից NEWS.am-ին հայտնում են, որ շնորհանդեսի ընթացքում ներկայացվել է միության կազմում ընդգրկված համայնքների գույքահարկի եւ հողի հարկի ավտոմատացված համակարգի ցանցը, միության կայքը:
Ներկայացվել են նաեւ ծրագրի շրջանակում մշակված միջհամայնքային համագործակցության հինգ նախագծեր, որոնք մասնավորապես վերաբերում են համայնքներում աղբահանության կազմակերպմանը, միջհամայնքային ճանապարհների բարեկարգմանը, համայնքային կարեւորության այլ խնդիրների: Նշված ծրագրերը կյանքի կոչելու համար Սիսիանի համայնքների միությունը մտադիր է դիմել դոնոր կազմակերպությունների: «Համատեղ ուժերով զարգացնենք համայնքը» ծրագիրն իրագործվել է ԱՄՆ ՄԶԳ աջակցությամբ «Քաունթերփարթ ինթերնեշնլ» կազմակերպության կողմից իրականացվող «Քաղաքացիական հասարակության եւ տեղական ինքնակառավարման աջակցության ծրագրի» շրջանակում:
Այցի շրջանակում փոխվարչապետը Սիսիան եւ Գորիս քաղաքներում մասնակցել է փոստային մասնաճյուղերի, իսկ Տաթեւ համայնքում`փոստային բաժանմունքի վերաբացման արարողություններին: Նշվել է, որ մինչեւ տարեվերջ կնորացվեն եւ կվերաբացվեն նաեւ Ագարակի, Քաջարանի, Կապանի փոստային բաժանմունքները:
