նախընտրելի դարձնել
Հայաստանը շարունակում է աշխատել Մարդու իրավունքների եվրոպական դատարանի հետ՝ պահանջելով պարբերաբար տրամադրել Բաքվում պահվող բանտարկյալների և քաղաքացիական անձանց տվյալները։
Դրա մասին մարտի 4-ին Ազգային ժողովի նիստում հայտարարել է միջազգային իրավական հարցերով հանրապետության ներկայացուցիչ Եղիշե Կիրակոսյանը՝ պատասխանելով պատգամավոր Թագուհի Թովմասյանի հարցին։
Նա պարզաբանել է, որ ՄԻԵԴ-ին ուղղված Հայաստանի պահանջները վերաբերում են ոչ միայն Լեռնային Ղարաբաղի նախկին պետնախարար, գործարար Ռուբեն Վարդանյանին, այլ նաև կալանավորված այլ անձանց։
«Այս իրավական գործընթացը շարունակվում է վերջին մի քանի ամիսների ընթացքում։ Այս «դատական» վարույթի կապակցությամբ մենք միջպետական բողոք ենք ներկայացրել դեռ 2023 թվականի սեպտեմբերին։ Այսինքն՝ այն ժամանակաշրջանում, երբ տեղի ունեցավ Լեռնային Ղարաբաղից հայերի բռնի տեղահանումը։ Այնուհետև մենք մեկ այլ բողոք ներկայացրեցինք, որը ներառում էր բանտարկյալների և կալանավորների հարցը»,- նշել է պաշտոնյան։
Ըստ նրա՝ վերոհիշյալ բողոքի վերաբերյալ դատական գրագրության փուլն ավարտվել է 2024 թվականի դեկտեմբերին, որից հետո ՄԻԵԴ-ը Ադրբեջանի դեմ միջանկյալ միջոցներ է ընդունել։
«Այս որոշումների շրջանակում Հայաստանը պարբերաբար հաղորդումներ է ստանում բանտարկյալների առողջության և պահման պայմանների մասին, որոնք այնուհետև փոխանցվում են նրանց հարազատներին»,- հավելել է Կիրակոսյանը։
Վերջին տվյալները ստացվել են փետրվարի սկզբին։ ՄԻԵԴ-ում Հայաստանի ներկայացուցիչը նշել է, որ հայկական կողմն ուշադրությամբ ուսումնասիրում է բանտարկյալներին առնչվող բոլոր հրապարակումները, լուսանկարներն ու տեսանյութերը և դրանք ներկայացնում Եվրոպական դատարան։
