նախընտրելի դարձնել
Իսրայելում ԱՄՆ դեսպան Մայք Հաքաբին ուրբաթ հայտնել է Գազայի հատված մարդասիրական օգնության եւ սննդի առաքման նոր համակարգի մասին, որը կսկսի գործել «շատ շուտով», հայտնել է Euronews-ը։
Ընդունելով սովի եւ սարսափելի հումանիտար ճգնաժամի մասին հաղորդումների իրականությունը՝ Հաքաբին նշել է, որ բարեգործական կազմակերպությունները, շահույթ չհետապնդող կազմակերպությունները եւ կառավարությունները կհամագործակցեն օգնության բաշխման նոր համակարգի ուղղությամբ, որը կփոխարինի ՄԱԿ գլխավորած ներկա ջանքերին:
«Սա զգալի ջանքեր եւ գործընկերություն կպահանջի ոչ միայն ամբողջ աշխարհի կառավարություններից, այլեւ ՀԿ-ներից, բարեգործական կազմակերպություններից, շահույթ չհետապնդող կազմակերպություններից»,- ասել է Հաքաբին:
«Կան մի քանի գործընկերներ, որոնք արդեն համաձայնել են մասնակցել այդ աշխատանքներին, մենք դեռ պատրաստ չենք նրանց անունները նշել, քանի որ նրանց մասնակցության որոշ մանրամասներ դեռ մշակվում են»,- շարունակել է նա։
ԱՄՆ դեսպանը չի մանրամասնել այս նոր նախաձեռնության լոգիստիկայի մասին, սակայն ընդգծել է, որ Իսրայելը կապահովի մատակարարումների անվտանգությունը։
«Առաջին՝ սնունդը պետք է արդյունավետ եւ ապահով կերպով բաշխվի Գազայի ներսում այն մարդկանց, ովքեր դրա կարիքն ունեն: Մեկ այլ գործոն, որը շատ կարեւոր է, այն է, որ այս ամենը պետք է արվի այնպես, որ ՀԱՄԱՍ-ը չկարողանա դրա վրա դնել իր ձեռքը»,- ասել է նա:
Հաքաբին հավաստիացրել է, որ Իսրայելը միայն անվտանգություն կապահովի, որպեսզի օգնությունը հասնի իր նպատակային հասցեատերերին: Սակայն համակարգն ամբողջությամբ կվերահսկվի ինքնուրույն:
Իսրայելը նախկինում «մտահոգություն» էր հայտնել թալանի եւ ՀԱՄԱՍ-ի գրոհայիններին նախատեսված միջոցների վերուղղորդման վերաբերյալ, սակայն այդ պնդումները հերքվել են ՄԱԿ պաշտոնյաների եւ բուժաշխատողների կողմից:
Իսրայելը շարունակում է շրջափակել այնպիսի հիմնական պաշարները, ինչպիսիք են սնունդը, վառելիքը եւ դեղորայքը:
Թեեւ Իսրայելն ասել է, որ թույլ կտա Գազա հասնել միայն մի համակարգով, որը թույլ է տալիս վերահսկել բաշխումը, Հաքաբին ընդգծել է, որ նոր համակարգը չպետք է կոչվի իսրայելական:
ՄԱԿ-ը հետեւողականորեն մերժել է Իսրայելին օգնության բաշխման վերահսկողությունը փոխանցող ցանկացած ծրագիր:
ՄԱԿ պաշտոնյաները նշել են, որ ցանկացած պայմանավորվածություն, որով Իսրայելը կորոշի, թե ով ինչ կստանա, խախտում է այն կազմակերպության մարդասիրության սկզբունքները, որը խոստանում է պաշտպանել մարդասիրությունը, անաչառությունը, անկախությունը եւ չեզոքությունը:
