նախընտրելի դարձնելԱՄՆ Սենատը հետաձգել է ցանցահենության դեմ պայքարին ուղղված օրինագծի քվեարկությունը: «Վերջին իրադարձությունների լույսի ներքո» հունվարի 20-ին նման որոշում է կայացրել Սենատում դեմոկրատական մեծամասնության ղեկավար Հարրի Ռիդը:
PIPA-ի (Protect Intellectual Property Act) քվեարկությունը պետք է կայանար 24-ին: Օրինագծի քվեարկությունը հետաձգելու մասին Ռիդին կոչ էր արել նաեւ հանրապետական փոքրամասնության առաջնորդ Մաքքոնելը: Հասարակության ճնշման ներքո Ներկայացուցիչների պալատի մի շարք անդամներ եւս հրաժարվել են աջակցել օրինագծին:
Հիշեցնենք, որ օրինագծի ընդունման դեմ լայնածավալ արշավ էր սկսվել համացանցում: Google կորպորացիան հավաքել էր մի քանի միլիոն ստորագրություն` Կոնգրեսի ստորին պալատում գտնվող նմանատիպ փաստաթուղթը` SOPA-ն (Stop Online Piracy Act) չընդունելու դեմ: Օրինագծի դեմ էին հանդես եկել նաեւ խոշորագույն կայքերը` ինչպիսիք են Facebook-ը, Twitter-ը եւ Wikipedia-ն:
Հայտարարելով քվեարկության հետաձգման մասին` Ռիդը հույս է հայտնել, որ հասարակությանը կհաջողվի փոխզիջման հասնել օրինագծի հարցում: «Ցանցահենության արդյունքում ամերիկյան տնտեսությունը տարեկան կորցնում է միլիարդավոր դոլարներ, հազարավոր մարդիկ զրկվում են աշխատանքից»,-հիշեցրել է սենատորը, հաղորդում է BBC-ն:
