Այսօրվա ֆորումի նպատակն է ամրապնդել բանկային համակարգի բոլոր շահագրգիռ կողմերի միջև կառուցողական երկխոսության ավանդույթը։ Այս մասին սեպտեմբերի 23-ին «Բանկային համակարգի ապագան. նորարարություններ և զարգացման հեռանկարներ» ֆորումի ժամանակ հայտարարեց Հայաստանի բանկերի միության նախագահ Դանիել Ազատյանը։

Նա բացատրեց, որ այս տարվա ֆորումը բացառիկ է ոչ միայն մասնակիցների թվով, այլև քննարկվող հարցերի լայն շրջանակով։ Ազատյանը հայտնեց, որ միջոցառմանը մասնակցում են փորձագետներ ԱՄՆ-ից, Մեծ Բրիտանիայից, Ավստրիայից, Գերմանիայից, Լյուքսեմբուրգից, Լեհաստանից, Հունաստանից, Վրաստանից և ԱՄԷ-ից։

Ըստ նրա՝ ֆորումը նպաստում է գործարար կապերի ամրապնդմանը և նպատակ ունի քննարկել այնպիսի թեմաներ, ինչպիսիք են թվայնացումը, կիբերանվտանգությունը և ժամանակակից բանկային ծառայությունների ստանդարտների ներդրումը։

Նա նշեց, որ համագործակցության վերջնական նպատակը բանկային ծառայությունների որակի բարելավումն ու հանրության համար դրանց մատչելիության բարձրացումն է։ «Դա հնարավոր է միայն երկխոսության և միջազգային լավագույն փորձի ներդրման միջոցով, որը ապահովում է ֆինանսական համակարգի նկատմամբ հանրության վստահության աճը», - եզրափակեց Ազատյանը։