Լեհաստանում Ռուսաստանի դեսպանատանը պատկանող մեքենան շաբաթ երեկոյան Վարշավայի Վիսլոստրադա փողոցում շրջվել է, հայտնում է RMF24-ը։

Կրասինսկու փողոցի վրայի վիադուկից Լոմյանեկից դեպի քաղաքի կենտրոն շարժվող «Dacia» մակնիշի մեքենան դուրս է եկել ճանապարհից և բախվել է էներգիա կլանող արգելապատնեշին։ Այդ արգելապատնեշի բեկորները հարվածել են դիմացից եկող այլ մեքենաների։

Ճանապարհատրանսպորտային պատահարը Վիսլոստրադայում տեղի է ունեցել շաբաթ երեկոյան՝ տեղական ժամանակով մոտ 19:00-ին։ «Dacia»-ի վարորդը անհայտ պատճառներով կորցրել է կառավարումը, ինչից հետո բախվել է արգելապատնեշին։

Ոստիկանությունը Վիսլոստրադայի դեպքի մասին տեղեկացրել է, որ վարորդը եղել է Ռուսաստանի դեսպանատան աշխատակից։

Վիսլոստրադայում բախմանը մասնակցած բոլոր վարորդները սթափ են եղել։ Ոչ ոք հիվանդանոց չի ընկել, իսկ ճանապարհից դուրս եկած՝ ռուսական դեսպանատանը պատկանող մեքենայի վարորդը տուգանվել է։ Հայտնի է, որ կործանված մեքենայի մասերը հարվածել են դիմացից շարժվող մեքենաներին։ Չնայած վթարի սարսափելի տեսքին՝ այն, ի վերջո, որակվել է որպես ճանապարհային բախում։

Դեպքի վայրում աշխատել են ծառայությունները՝ հրշեջներ, ոստիկանություն և շտապ օգնություն։ Դեպքի վայրի տարածքը շրջափակվել է, հրշեջներն անջատել են մեքենաների էներգիան և մաքրել թափված շահագործական հեղուկները։ Ճանապարհից վնասված տարրերը հեռացնելուց հետո Վիսլոստրադայում երթևեկությունը վերականգնվել է։