ԱՄՆ նախագահ Դոնալդ Թրամփը ստորագրել է կառավարության ժամանակավոր ֆինանսավորման մասին օրենքը, որով ավարտվել է երկրի պատմության մեջ ամենաերկարատև «շաթդաունը», հայտնում է CNN-ը։ Երկու պալատների կողմից հավանության արժանացած փաստաթուղթը ֆինանսավորում է նախատեսում մինչև 2026 թվականի հունվարի 30-ը և թույլ է տալիս անմիջապես վերսկսել դաշնային գերատեսչությունների աշխատանքը՝ 43-օրյա ընդմիջումից հետո։

Ռեկորդային շաթդաունը Հանրապետականների և Դեմոկրատների միջև հակամարտության արդյունք էր։ Վերջիններս հրաժարվում էին հաստատել բյուջեի նախագիծը, քանի որ այն չէր նախատեսում Մատչելի առողջապահության մասին օրենքի (հայտնի նաև որպես obamacare) շրջանակներում սուբսիդիաների երկարաձգում, որոնց գործողության ժամկետը լրանում է 2025 թվականի վերջին։ Նախորդ տարիներին Միացյալ Նահանգներին հաջողվում էր խուսափել լայնածավալ շաթդաուններից՝ օգտագործելով ժամանակավոր բյուջետային բանաձևեր, սակայն այս անգամ Սենատում նման փաստաթուղթ ընդունելու համար բավարար ձայներ չեղան։ Իրավիճակից դուրս գալու ելքը գտնվել է միայն այն ժամանակ, երբ չափավոր դեմոկրատների մի խումբ և մեկ անկախ սենատորը համաձայնել են քվեարկել բյուջեի նախագծի օգտին։

Օրենքը ստորագրելու ժամանակ Թրամփը կոչ է արել ընտրողներին չմոռանալ շաթդաունի մասին հաջորդ ընտրությունների ժամանակ։ Ըստ նրա՝ Դեմոկրատները «ուրախ էին, որ միլիոնավոր ամերիկացիներ տառապում են»։ «Ոչ ոք երբեք նման բան չի տեսել», — ընդգծել է Սպիտակ տան ղեկավարը։ Միևնույն ժամանակ, ճգնաժամի պատճառ դարձած առանցքային հարցը մնացել է չլուծված. Հանրապետական սենատորները միայն խոստացել են, բայց չեն երաշխավորել, որ առանձին քվեարկություն կանցկացնեն «Obamacare»-ի սուբսիդիաների երկարաձգման շուրջ։ Առաջիկա երկուսուկես ամիսների ընթացքում Կոնգրեսի անդամներին բանակցություններ են սպասվում՝ լիարժեք դաշնային բյուջե ընդունելու համար։

Շաթդաունի ընթացքում գրեթե 700 հազար դաշնային ծառայողներ ուղարկվել էին չվճարվող արձակուրդների, իսկ նրանց մի մասը ստացել էր աշխատանքից ազատվելու մասին ծանուցումներ։ Ազգային գվարդիայի զինծառայողները, ոստիկանները, ավիադիսպետչերները և տրանսպորտային ծառայությունների աշխատակիցները ստիպված էին աշխատել առանց աշխատավարձի։ Ֆինանսավորման բացակայության պատճառով խափանումներ էին առաջացել նաև SNAP (Supplemental Nutrition Assistance Program) պարենային օգնության ծրագրի իրականացման մեջ, որից օգտվում է գրեթե 42 միլիոն ամերիկացի։