Շաբաթ օրը Թաիլանդը հայտարարել է, որ Միացյալ Նահանգները տեղեկացրել է Բանգկոկին, որ դադարեցնում է փոխադարձ առեւտրային համաձայնագրի շուրջ բանակցությունները, մինչեւ Թաիլանդի կառավարությունը չհաստատի Կամպուչիայի հետ հրադադարի պահպանման հանձնառությունը, տեղեկացրել է Reuters-ը։

Ավելի վաղ Թաիլանդը հայտարարել էր, որ ԱՄՆ միջնորդությամբ Կամպուչիայի հետ սահմանային բախումները դադարեցնելուն ուղղված հրադադարի համաձայնագիրը չի կարող իրականացվել Պնոմպենի կողմից ենթադրյալ խախտումների պատճառով։

ԱԳՆ ներկայացուցիչ Նիկոռնդեյ Բալանկուրան լրագրողներին հայտնել է, որ ուրբաթ երեկոյան ԱՄՆ առեւտրային ներկայացուցչի գրասենյակից ստացվել է նամակ, որում հայտարարվում է առեւտրային համաձայնագրի մանրամասները վերջնականապես հաստատելու շուրջ բանակցությունների դադարեցման մասին։

Նա մեջբերել է USTR նամակը, որում նշվել էր, որ առեւտրային բանակցությունները կարող են վերսկսվել, երբ Թաիլանդը վերահաստատի Կամպուչիայի հետ համատեղ հրադադարի մասին հայտարարությունը կատարելու հանձնառությունը: Երկու կողմերն էլ պետք է բանակցեն եւ վերջնականապես մշակեն առեւտրային համաձայնագրի մանրամասները եւ այն ստորագրման պատրաստեն՝ նախքան դրա ուժի մեջ մտնելը։

Անցյալ ամիս Վաշինգտոնը եւ Բանգկոկը հայտարարել էին շրջանակային առեւտրային համաձայնագրի մասին, որի համաձայն՝ ԱՄՆ-ը կպահպանի 19 տոկոս սակագին թաիլանդական ապրանքների վրա՝ միաժամանակ նշելով այն ապրանքները, որոնց սակագները կարող են ճշգրտվել կամ զրոյացվել: ԱՄՆ նախագահ Դոնալդ Թրամփը ուրբաթ երեկոյան զրուցել է Թաիլանդի եւ Կամպուչիայի առաջնորդների հետ առանձին-առանձին, այն բանից հետո, երբ այս շաբաթ սահմանային լարվածությունը կրկին սրվել է, եւ ասել է, որ իր կարծիքով, «ամեն բան լավ կլինի»:

Նա չի հիշատակել USTR նամակը, որում նշվում էր, որ առեւտրային բանակցությունները կասեցվել են: Այս մասին նաեւ չի հիշատակվել USTR կամ Սպիտակ տան կայքերում, որոնք հրապարակում են լուրեր այլ երկրների հետ առեւտրային բանակցությունների մասին:

Թաիլանդն այս շաբաթ կասեցրել է հրադադարի համաձայնագիրը եւ պահանջել ներողություն խնդրել Կամպուչիայի կողմից նոր ականներ տեղադրելու եւ թաիլանդցի զինվորներին վիրավորելու մեղադրանքների համար, ինչը Կամպուչիան հերքում է