նախընտրելի դարձնել
Ամերիկացի լեռնագնաց Ալեքս Հոնոլդը կիրակի օրը բարձրացել է «Թայբեյ 101» երկնաքերի գագաթին՝ առանց պարանների և ապահովիչ ցանցի, իսկ հազարավոր հրճվող և նրան ձեռքով ողջունող երկրպագուներ հետևել են, թե ինչպես է նա բարձրանում աշխարհի ամենաբարձր շենքերից մեկի վրա, հայտնում է Reuters-ը։
«Ես ուժասպառ եղա», — ասաց Հոնոլդը, երբ հասավ Թայվանի ամենաբարձր շենքի գագաթին՝ 91 րոպե տևած «ազատ միայնակ» վերելքից հետո, որը կազմակերպել և ուղիղ եթերում ցուցադրել էր Netflix-ը։
«Ինչ հրաշալի միջոց է տեսնելու Թայբեյը», — ասել է նա լրագրողներին վերելքի ավարտից հետո, որը մեկ օրով հետաձգվել էր անձրևային եղանակի պատճառով։
508 մետր բարձրությամբ «Թայբեյ 101» երկնաքերը, որը վեր է խոյանում քաղաքի հորիզոնում և զբոսաշրջիկների գլխավոր տեսարժան վայրերից մեկն է, 2004-ից մինչև 2010 թվականը համարվել է աշխարհի ամենաբարձր շենքը։ Ներկայումս այդ տիտղոսը պատկանում է Դուբայում գտնվող «Բուրջ-Խալիֆա» երկնաքերին։ Վերելքն առանց ապահովիչ սարքավորումների իրականացվել է քաղաքային կառավարության լիակատար աջակցությամբ և թույլտվությամբ։
Հոնոլդը պատմել է, որ մի անգամ մտածել է շենքը բարձրանալ առանց թույլտվության։
«Բայց հետո, շենքի և թիմի բոլոր անդամների հանդեպ հարգանքից ելնելով, որոնք ինձ հնարավորություն տվեցին նայել դրան, ես մտածեցի․ «Ակնհայտ է, որ ես չեմ պատրաստվում դա գաղտնի անել, ես պատրաստվում եմ հարգել մարդկանց և պարզապես տեսնել՝ արդյոք երբևէ հնարավոր կլինի ինչ-որ բան անել միասին», — ասել է նա։
Սա «Թայբեյ 101»-ի գագաթին բարձրանալու առաջին դեպքը չէ։ 2004 թվականին ֆրանսիացի լեռնագնաց Ալեն Ռոբերը, որը ստացել էր «Սարդ-մարդ» մականունը՝ աշխարհի ամենաբարձր երկնաքերերը առանց պարանների բարձրանալու համար, բարձրացել էր այս շենքը, թեև դա արել էր ապահովիչ պարանով և չորս ժամում։
