Չորեքշաբթի առավոտյան Իրանը մի քանի բալիստիկ հրթիռ է արձակել Իսրայելի ուղղությամբ, ինչից հետո Իսրայելի զգալի տարածքում տագնապի ազդանշաններ են հնչել։ Հարվածի հետևանքով որոշակի նյութական վնաս է հասցվել, սակայն տուժածներ չկան։ Այս մասին հայտնում է The Jerusalem Post-ը:

Հրդեհ է բռնկվել Հադերա քաղաքի մոտակայքում՝ Իսրայելի հյուսիսային քաղաքում հրթիռի բեկորի ընկնելու մասին լուրերից հետո:

Հադերան գտնվում է Հայֆայի մարզում՝ Թել Ավիվի և Հայֆայի միջև:

Ավելի ուշ՝ չորեքշաբթի օրը, Իսրայելի էլեկտրական կորպորացիան հայտարարել է, որ, չնայած շրջանառվող լուրերին, տարածաշրջանում իր ենթակառուցվածքները հարվածներից չեն տուժել։ Հաղորդվել է նաև Շարոնի ողջ տարածաշրջանում բեկորների ընկնելու մասին։

«Մագեն Դավիդ Ադոմ» շտապօգնության ծառայությունը հայտնել է, որ իր արձագանքման խմբերը մեկնել են Կենտրոնական Իսրայելի առնվազն յոթ վայրեր, որտեղ, ըստ նախնական տվյալների, բեկորներ են ընկել։ Չորեքշաբթի առավոտյան տեղի ունեցած գնդակոծության հետևանքով տուժածների մասին տեղեկություններ չկան։

Ավելի վաղ Իսրայելի հյուսիսում հակաօդային պաշտպանության ուժերը շուրջ 30 րոպե հետապնդել են Վերին և Ստորին Գալիլեայի երկնքում հայտնված անօդաչու թռչող սարքերը, մինչև որ դրանք վերջնականապես խոցվել են։