Մերձավոր Արևելքում ռազմական գործողությունները շարունակվում են՝ սրելով լարվածությունը տարածաշրջանում և առաջացնելով միջազգային մտահոգություն: Երկու կողմերի կողմից ռազմական հարվածներն ու պատասխան գործողությունները շարունակում են ազդել ոչ միայն տարածաշրջանի երկրների, այլև համաշխարհային տնտեսական իրավիճակի վրա:

NEWS.am-ը ներկայացնում է Մերձավոր Արևելքում ուրբաթ երեկոյան տեղի ունեցած հիմնական իրադարձությունների համառոտ ակնարկ

Իսրայելի պաշտպանության ուժերը (IDF) հաղորդել են Թեհրանի կենտրոնում հարվածների շարքի մասին: «Որոշ ժամանակ առաջ Իսրայելի պաշտպանության ուժերը ավարտեցին Թեհրանի կենտրոնում գտնվող իրանական ահաբեկչական ռեժիմի ենթակառուցվածքների դեմ լայնածավալ հարվածների շարք», - գրել է Իսրայելի զինված ուժերը իր Telegram ալիքում։

Պենտագոնը քննարկում է մինչև 10,000 ամերիկացի զինվորական ուղարկելու հարցը Մերձավոր Արևելք՝ Իրանի հետ հակամարտության հնարավոր սրման նախապատրաստման համար, հաղորդում է The Wall Street Journal-ը՝ հղում անելով Պաշտպանության նախարարության պաշտոնյաներին, որոնք ծանոթ են ծրագրերին:

ԱՄՆ նախագահ Դոնալդ Թրամփը հայտարարել է, որ որոշել է հետաձգել Իրանի էներգետիկ օբյեկտների վրա հարվածները ևս 10 օրով՝ Թեհրանի հետ բանակցություններ վարելու համար: Նա ասաց, որ որոշումը կայացվել է Իրանի կառավարության խնդրանքով, չնայած Թեհրանը հերքում է, որ դա խնդրել է։

Հորմուզի նեղուցը կարող է բացվել նավագնացության համար «արդեն վաղը», - մարտի 26-ին հայտարարեց ԱՄՆ պետքարտուղար Մարկո Ռուբիոն։ «Այն կարող է բացվել արդեն վաղը, եթե Իրանը դադարի սպառնալ համաշխարհային նավագնացությանը», - ասաց նա լրագրողների հետ զրույցի ժամանակ։

Մարտի 26-ին Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսին հայտարարեց, որ Բուշերի ատոմակայանի վրա հարձակումների պատճառով կա խոշոր միջուկային վթարի վտանգ։