նախընտրելի դարձնել
ԱՄՆ պետքարտուղարի նախկին տեղակալ Վենդի Շերմանը Bloomberg գործակալությանը տված հարցազրույցում հայտարարել է, որ Իրանի շուրջ ստեղծված ճգնաժամն ավելի ու ավելի վտանգավոր է դառնում և չունի պարզ ռազմական լուծում։
Ըստ նրա, ներկայիս իրավիճակը զգալիորեն ավելի բարդ է, քան 2015 թվականի միջուկային գործարքի շուրջ բանակցությունների շրջանը, քանի որ Իրանն ավելի կոշտ դիրքորոշում է որդեգրել, իսկ տարածաշրջանային լարվածությունը կտրուկ աճել է։
«Այն դարձել է ավելի բարդ, ավելի վտանգավոր և ռազմավարական առումով սխալ հաշվարկված», — նշել է Շերմանը՝ մեկնաբանելով Վաշինգտոնի ներկայիս կուրսը Իրանի նկատմամբ։
Նա ընդգծել է, որ ԱՄՆ-ն ամեն դեպքում ստիպված է լինելու վերադառնալ լուրջ դիվանագիտությանը, քանի որ նման ճգնաժամերը հնարավոր չէ լուծել արագ կամ բացառապես ճնշման միջոցով։ Շերմանի կարծիքով, Իրանն իրեն չի համարում մի կողմ, որը պատրաստ է կապիտուլյացիայի ենթարկվել ամերիկյան ճնշման ներքո, իսկ Հորմուզի նեղուցի շուրջ ստեղծված իրավիճակը միայն ուժեղացնում է փոխադարձ դիմակայությունն ու ռիսկերը երկու կողմերի համար։
«Դա հնարավոր չէ անել արագ։ Դրանք բարդ բանակցություններ են, որոնք պահանջում են փորձագետներ և տևական դիվանագիտություն», — շեշտել է ԱՄՆ պետքարտուղարի նախկին տեղակալը։
Շերմանը նաև նշել է, որ նույնիսկ եթե հաջողվի վերականգնել նավերի տեղաշարժը Հորմուզի նեղուցով, բուն ճգնաժամն արդեն փոխել է ռազմավարական իրավիճակը տարածաշրջանում, իսկ Իրանն այժմ համոզված է, որ ի վիճակի է օգտագործել նեղուցի նկատմամբ վերահսկողությունը որպես ճնշման կարևոր լծակ։
