Ղազախստանը կարող է դուրս գալ Եվրասիական տնտեսական միության կազմից, որում ընդգրկված են նաեւ Ռուսաստանն ու Բելառուսը: Այս մասին հայտարարել է երկրի նախագահ Նուրսուլթան Նազարբաեւը «Խաբար» հեռուստաալիքին տված հարցարզրույցում:
«Եթե կանոնները, որոնք նախկինում հաստատվել են համաձայնագրում, չիրագործվեն, ապա Ղազախստանն իրավունք ունի հրաժարվել Եվրասիական տնտեսական միությանն անդամակցությունից: Աստանան երբեք չի լինի կազմակերպության կազմում, որը վտանգ է ներկայացնում Ղազախստանի անկախության համար»,- ընդգծել է Նազարբաեւը:
«NEWSru.com» գործակալությունը ենթադրում է, որ ղազախ առաջնորդի դեմարշի պատճառը Ռուսաստանի նախագահ Վլադիմիր Պուտինի խոսքերն էին օգոստոսի 29-ին երիտասարական «Սելիգեր» հավաքի ժամանակ, երբ նա նշեց, որ Նազարբաեւը պետություն է ստեղծել տարածքում, որտեղ երբեք պետություն չի եղել:
ՌԼԴԿ առաջնորդ Վլադիմիր Ժիրինովսկին «Էխո Մոսկվի» ռադիոկայանի եթերում հայտարարել էր, որ Ուկրաինայում տեղի ունեցող իրադարձություններից հետո Ռուսաստանին հարկավոր է ուշադրություն դարձնել Ղազախստանին, որտեղ, իբր, «ամենուրեք հակառուսական տրամադրություններ են նկատվում»: «Էխո Մոսկվի»-ի տվյալներով, Ղազախստանի բնակիչները ՌԴ նախագահի հայտարարությանը պատասխանել են «Պատմության դասագիրք ուղարկիր Պուտինին» ակցիայով: