Հակառակորդն էլ, մենք էլ միշտ կատարում ենք պաշտպանական բնագծի ինժեներական կահավորում: Այս մասին NEWS.am-ի թղթակցի հետ զրույցում ասաց Պաշտպանության նախարարի մամուլի խոսնակ Արծրուն Հովհաննիսյանը՝ մեկնաբանելով լրատվամիջոցներում տարածված լուրերը, որ ադրբեջանցիները ամրացնում են Հայաստանի հետ իրենց սահմանները:
ՊՆ խոսնակի կարծիքով՝ բնական է, որ սառեցված, թեժացող, իսկ մեր պարագայում նաև` դանդաղ պատերազմի մեջ գտնվող հակամարտության կողմերը պարբերաբար կահավորում են իրենց պաշտպանական բնագիծը: «Մենք էլ, իրենք էլ իրենց պաշտպանական բնագծի ինժեներական կահավորումը մշտապես կատարում ենք, հագեցնում, սա մշտական պրոցես է, հակամարտության տրամաբանություն դա է հուշում»,-ասաց Արծրուն Հովհաննիսյանը:
Ավելի վաղ հայտնել էինք, որ ադրբեջանական զինուժը այս օրերին Հայաստանի հետ սահմանի երկայնքով ինժեներական ամրացման աշխատանքներ է իրականացնում: Մի քանի օր առաջ մեր թղթակիցը արձանագրել է, որ հայ-ադրբեջանական շփման գծի Երասխ-Սադարակ հատվածում հակառակորդի բուլդոզերը հողի բարձր պատնեշներ է կառուցում անմիջապես սեփական խրամատների երկայնքով:
Տավուշի մարզի Իջեւանի տարածաշրջանից մեզ հասած տեղեկությունների համաձայն, նմանատիպ աշխատանքներ են ընթանում նաեւ Կայան-Ղազախ հատվածում, եւ ինչպես Երասխում, այնպես էլ այս դեպքում, հայկական կողմում լսելի է հակառակորդի ծանր տեխնիկայի շարժիչի ձայնը: Երեկ էլ Ֆեյսբուքում գրառումներ են հայտնվել այն մասին, որ ադրբեջանցիները ամրացնում են նաեւ Նոյեմբերյանի տարածաշրջանի հետ իրենց սահմանը»: