Էքստրասենս Անի Մաջնունյանի սպանության մեջ մեղադրվող Մուշեղ Մխիթարյանի նախկին կին, գործով վկա Հայաստան Եգորյանն այսօր` մայիսի 4-ին, Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում հրաժարվեց ցուցմունք տալ:
«Ոչինչ չունեմ ասելու, իր դեմ էլ ոչինչ չունեմ, դեպքի մասին իմացել եմ համացանցից»,- ասաց նա:
Վկան նաեւ նշեց, որ Մուշեղ Մխիթարյանն ու ինքը համատեղ ապրել են մեկուկես տարի, զավակ ունեն: Նա ասաց նաեւ, որ իրենք բաժանվել են սպանությունից մեկ ամիս առաջ եւ որեւէ կապ չեն ունեցել իրար հետ:
Կողերից ոչ մեկը հարց չուղղեց վկային: Փոխարենը ամբաստանյալը տեղից վրդովվեց` ասելով, թե քննիչը դրդել է վկային իր դեմ վկայություն տալ նախաքննության ընթացքում:
«Քննիչը չի դրդել, որպես քեզ ճանաչող մարդու հարցրել են` ով ես»,- պատասխանեց վկան:
Ամբաստանյալն էլ ավելի վրդովվեց, տեղից վեր կացավ, փորձեց հեռանալ նիստերի դահլիճից, ոստիկանները թույլ չտվեցին: Դատավորը զգուշացրեց նրան այլեւս նման վարք չդրսեւորել, հակառակ դեպքում սանկցիա կկիրառի:
Դատական նիստը հետաձգվեց մյուս ծանուցված վկաների չներկայանալու պատճառով: Նրանցից երկուսին բերման ենթարկելու որոշում կայացվեց:
Մուշեղ Մխիթարյանի պաշտպանը NEWS.am-ի հետ զրույցում նշեց, որ վկան նախաքննության ընթացքում տված ցուցմունքում նույնպես ասել է, որ դեպքից տեղյակ չի, ասել է նաեւ, որ Մուշեղից բաժանվել է, քանի որ նա տարօրինակ մարդ է եղել, չի կարողացել հետը ապրել:
Հիշեցնենք, որ 2015թ. օգոստոսի 5-ին Երեւանի Մազմանյան 5 շենքի թիվ 20 բնակարանում հայտնաբերվել էր «6-րդ զգայարան» հաղորդաշարի էքստրասենս, 53-ամյա Անի Մաջնունյանի դին՝ բազմաթիվ ծակած-կտրած վնասվածքներով:
Սպանության մեջ մեղադրվում է 21-ամյա Մուշեղ Մխիթարյանը, որին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ): Նա կալանավորված է, չի ընդունում իր մեղքը: