Մեծ Բրիտանիայում հինգշաբթի ուժի մեջ է մտել այսպես կոչված «օրինական թմրանյութի» նկատմամբ արգելքը, որը նախ եւ առաջ վերաբերում է ծխախոտային խառնուրդներին եւ «ուրախացնող գազին»:
Օրենքները, որոնք քրեորեն հետապնդելի են դարձնում նման նյութերի պատրաստումը եւ տարածումը, ուժի մեջ են մտել հինգշաբթի գիշերը, հայտնում է BBC-ի ռուսական ծառայությունը:
Արգելքը տարածվում է սփայսների, ուրախացնող գազի, սալվիա դիվինորումի եւ մեֆեդրոնի վրա: Սփայսը եւ մեֆեդրոնը ներկայացվում են որպես արգելված թմրանյութերի` ՄԴՄԱ-ի եւ մարիխուանայի սինթետիկ անալոգներ:
Ուրախացնող գազը կամ ազոտի ենթաօքսիդը եւ սալվիա դիվինորում բույսը (եղեսպակի տեսակ) առավել թեթեւ նյութեր են, սակայն դրանք եւս արգելվել են:
Անցյալ տարի Բրիտանիայում մոտ 100 մահ է տեղի ունեցել` կապված «օրինական թմրանյութերի» հետ: Նոր օրենքին համապատասխան, դրանց տարածումը կպատժվի մինչեւ յոթ տարի ժամկետով:
Շատ դիտորդներ համարում են, որ արգելքը չի լուծում խնդիրը: Խանութներում սփայսերի օրինական վաճառքի տարիներին խառնուրդների առեւտրականների մոտ հաճախորդների բազաներ են ձեւավորվել, որոնց նրանք ամենայն հավանականությամբ կշարունակեն խառնուրդներ վաճառել:
Փորձագետներն անհանգստանում են, որ ամբողջ առեւտուրն ուղղակի կվարվի անօրինական ուղիներով` փողոցներում եւ ինտերնետով:
Ռուսաստանում ծխախոտային խառնուրդների արգելքն ուժի մեջ է մտել 2010-ին, բայց առաջվա նման հաղորդագրություններ են ստացվում ծխախոտային խառնուրդների օգտագործումից մարդկանց մահվան մասին:
