Նախընտրելի
Պաշտոնատար անձանց տների վրա հարձակումներ գործելու կամ այսպես կոչված «Բանդայի գործով» Վճռաբեկ դատարանը փաստաբանների դիմումն արդեն 2 ամիս վարույթ չի ընդունում: Այս մասին այսօր՝ օգոստոսի 15-ին, NEWS.am-ի հետ զրույցում ասաց փաստաբան Ստեփան Ոսկանյանը:
«Վճռաբեկի որոշումը շատ ուշացավ, բայց հնարավոր է` սա կապված է ամբաստանյալներից մեկի՝ Արթուր Մանուկյանի փաստաբանի հետ, քանի որ նա ուշ է ներկայացրել բողոքը»,-ասաց փաստաբանը:
Նրա խոսքով՝ եթե Վճռաբեկը վարույթ չընդունի, իրենք դիմելու են ավելի բարձր դատական ատյանի՝ Մարդու իրավունքների եվրոպական դատարան:
Նշենք, որ Երեւանի Կենտրոն եւ Նորք Մարաշ համայնքների ընդհանուր իրավասության դատարանը դեկտեմբերի 26-ին «Բանդայի» պարագլուխ համարվող Արտուշ Հակոբյանին դատապարտեց 15, Դավիթ Գալստյանին եւ Սամվել Դավթյանին՝ նույնպես 15, Արթուր Մանուկյանին՝ 11 տարվա ազատազրկման՝ առանց գույքի բռնագրավման: Վերաքննիչ դատարանն անփոփոխ թողեց առաջին ատյանի որոշումը:
Հիշեցնենք, որ 2011թ. սեպտեմբերի 23-ին ոստիկանության կազմակերպված հանցագործության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Քյարամ Ամոյանը, Արթուր Մանուկյանը, Դավիթ Գալստյանը եւ Սամվել Դավթյանը մեղադրվում են բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու համար: Ամբաստանյալները պնդում են, որ իրենք մեղավոր չեն, գործը բարդել են իրենց վրա:
