Ռուսաստանն Ուկրաինային նախազգուշացրել է Ղրիմի շրջանում հայտարարված կրակոցների ժամանակ ուկրաինական հրթիռները խոցելու պատրաստականության մասին, եթե ուկրաինական կողմի գործողությունները վտանգ ներկայացնեն, գրում է «Վեդոմոստի» թերթը՝ վկայակոչելով ՌԴ նախագահի մամուլի խոսնակ Դմիտրի Պեսկովին։
Պեսկովը հաստատել է, որ համապատասխան նախազգուշացումը եղել է դիվանագիտական նոտայում, որը ՌԴ իշխանությունները հղել են Կիեւին։
Ուկրաինան անցյալ շաբաթ հայտնել էր, որ մտադիր է հրթիռային կրակոցներ իրականացնել Ղրիմի մոտակայքում դեկտեմբերի 1-2–ը, ինչի կապակցությամբ ավիացիոն ծանուցում էր ուղարկել Սեւ ծովի չեզոք ջրերի՝ թռիչքների համար վտանգավոր գոտիների եւ մասամբ Ղրիմից հարավ–արեւմուտք եւ հարավ–արեւելք Ռուսաստանի տարածքային ջրերի գոտիների մասին։
