Այսօր խորհրդարանական ընտրություններին մասնակցելու համար փաստաթղթերը ԿԸՀ ներկայացնելու վերջնաժամկետն էր, իսկ քաղաքական ուժերը բարեհաճեցին մեկը մյուսի հետեւից Հանձնաժողով գալ օրվա ավարտին միայն:

Որոշ ուժեր փորձեցին աչքի ընկնել օրիգինալությամբ. Դաշնակցությունը, օրինակ, փաստաթղթերը բերեց առաջինը, իսկ ՀԱԿ-ՀԺԿ դաշինքը հոգուն վրա հասավ. ԿԸՀ մտան վերջնաժամկետը լրանալուց 4 րոպե առաջ:

Հանրապետականի ներկայացուցիչները ԿԸՀ էին եկել շոկոլադով եւ կոնյակով, «Ազատ դեմոկրատներ»-ը՝ ծաղկեփնջով:

Օհանյան-Րաֆֆի-Օսկանյան՝ ՕՐՕ հապավումով դաշինքի անակնկալն էլ քաղաքական էր. Րաֆֆի Հովհաննիսյանը հանգրվանել է դաշինքի համապետական ցուցակի 11-րդ հորիզոնականում: Մինչդեռ դաշինքից նեղացած Վիկտոր Դալլաքյանի հրապարակած ցուցակում «Ժառանգության» ղեկավարը երկրորդ տեղում էր: Նրա փոխարեն երկրորդ հորիզոնականում հայտնված Արմեն Մարտիրոսյանը պարզաբանել է. ցուցակը կազմվել է երեք կուսակցությունների առաջնորդների միասնական որոշմամբ:

Ընդհանուր առմամբ, ընտրություններին մասնակցելու հայտ է ներկայացրել 9 քաղաքական ուժ, որից 4-ը՝ դաշինք, 5-ը՝ կուսակցություն:

Նվազագույնը 5%-ի շեմը հաղթարահելու հույսով ընտրապայքարի մեջ են մտնում Հայաստանի կոմունիստները, ընտրություններին մասնակցելու է նաեւ «Հայկական վերածնունդը»:

Խորհրդարանում հայտնվելու համար 7%-ի շեմը ստիպված կլինեն հաղթահարել նաեւ «Ելք» եւ «Ծառուկյան» դաշինքները: Վերջին դաշինքը, ի դեպ, ձեւավորվեց վերջին պահին: Մինչ մրցակիցները ԿԸՀ էին շտապում, Գագիկ Ծառուկյանը դեռ հուշագիր էր ստորագրում «Ալյանս»-ի եւ «Առաքելության» հետ: Որպեսզի դաշինքով ընտրությունների գնալու նախաձեռնությունն ավելի համոզիչ լինի, այնտեղ ընդգրկել են նաեւ մի քանի ներկայացուցիչների ՀՀՇ-ից եւ «Հայազն»-ից:

Դաշինքի ստեղծման հուշագիրը ստորագրվել է կողմնակի աչքերից հեռու՝ փակ դռների հետեւում, բայց ծափահարություններ, այնուամենայնիվ, հնչեցին. Գագիկ Ծառուկյանին հանդիսավոր ընդունելու համար «Մոսկվա» կինոթատրոնի բակում տեւական ժամանակ շարք էին կանգնել մի խումբ երիտասարդներ եւ էմոցիոնալ կանայք:

Լրագրողների հարցերին Ծառուկյանը պատասխանեց միայն հուշագրի ստորագրումից հետո: ԲՀԿ ղեկավարն այսօր առանձնակի սիրառատ էր՝ լրագրողներին անընդհատ հաճոյախոսություններ էր շռայլում: Նրա ղեկավարած դաշինքի հետ կապված գլխավոր ինտրիգի պատասխանն այսօր, վերջապես, հնչեց. նրա խնամի Հովիկ Աբրահամյանը «Ծառուկյան» դաշինքի ընտրացուցակում չկա: Իսկ ինչպես է Ծառուկյանը վերաբերվում Սերժ Սարգսյանի հայտարարությանը, որ չի ողջունում իր՝ քաղաքականություն վերադարձը: Ծառուկյանն արձագանքեց. մեր երկրի նախագահն է, իր մոտեցումն է, իր որոշումը:

Իսկ Գյումրիի նախկին քաղաքապետ Վարդան Ղուկասյանը լրագրողների հետ զրույցն իր ոճով սկսեց: Ըստ երեւույթին՝ Վարդան Ղուկասյանն իսկապես հոգնել է: Դաշինքի տարածքային ցուցակով Գյումրիում առաջադրված Ղուկասյանին անակնկալի բերեց լրագրողների պարզ հարցը. ԲՀԿ-ն ընդդիմություն է, թե՞ ոչ:

ՀՀԿ-ից դուրս եկած Վարդան Ղուկասյանի՝ ընդդիմադիր լինելուն չի հավատում նաեւ մամուլը: Նրա համաքաղաքացի Վարդեւան Գրիգորյանին լրագրողները ուղիղ հարց տվեցին. ճի՞շտ է, որ ՀՀԿ-ն Ղուկասյանին հատուկ ԲՀԿ է գործուղել՝ վերջինի վարկանիշը գցելու համար:

Մայիսի 14-ին Երեւանի ավագանու հերթական ընտրությունները կանցկացվեն: Նոր Սահմանադրության համաձայն՝ հաջորդ ավագանին, որը նաեւ Երեւանի քաղաքապետին կընտրի, կպաշտոնավարի ոչ թե 4, այլ 5 տարի ժամկետով:

Վարչապետի այսօրվա հանձնարարականներից երկուսն ուղղված էր զբոսաշրջության զարգացմանը: Կարեն Կարապետյանը հայտարարել է «Մաքուր Հայաստան» ծրագրի մեկնարկի մասին: Մեր գյուղերն ու քաղաքները պետք է մաքուր պահենք, որ չամաչենք հյուրերի առջեւ:

Զբոսաշրջիկների ներգրավելու համար նաեւ կպարզեցնեն սահմանային անցակետերում օտարերկրյա քաղաքացիներին վիզա տրամադրելիս հարցաթերթիկների լրացման, վիզայի տուրքի գանձնման կարգերը: Ոստիկանապետն ու ֆինանսների նախարարը պետք է ուսումնասիրեն հարցը:

Կառավարության որոշմամբ՝ Զինծառայողների ապահովագրության հիմնադրամի հոգաբարձուների խորհրդի անդամներ են նշանակվել: Խորհրդում ընդգրկվել են պաշտպանության նախարար Վիգեն Սարգսյանն ու ֆինանսների փոխնախարար Կարեն Թամազյանը, առաջիկա խորհրդարանական ընտրությունների արդյունքներով էլ խորհրդի երրորդ անդամ կնշանակվի խոշորագույն ընդդիմադիր խմբակցության ղեկավարը:

Պաշտպանության նախարարության զորամասերից մեկի մարտական դիրք տանող ճանապարհին մեքենան ձորն է գլորվել: Բուլդոզերով դիրք տանող ճանապարհ էին մաքրում: Մեքենայում գտնվող պայմանագրային զինծառայող Գարեգին Հակոբի Մինասյանը մահացել է: Եվս երկու զինծառայողներ՝ Արմեն Միխայելի Պուխան եւ Վրույր Ֆիրդուսի Ներսիսյանը, մարմնական վնասվածքներով հոսպիտալացվել են: Քրեական գործ է հարուցվել:

Վիրավոր զինծառայողներից Վրույր Ներսիսյանի վիճակը ծանր է. նա վիրահատվել է: Արմեն Պուխայի վիճակը միջին ծանրության է:

Արարատի մարզի Գոռավան գյուղում դանակահարված տղամարդու դիակ են հայտնաբերել: Տեղեկությունների համաձայն՝ մահացածը գյուղի 72-ամյա բնակիչ Հովհաննես Աղաջանյանն է: Սպանության կասկածանքով ձերբակալվել է նրա որդին՝ 46-ամյա Մարտիկ Աղաջանյանը։

Երեւանում մահացած 30 օրական երեխան գանգի կոտրվածք է ունեցել. դատաբժշկական փորձաքննության արդյունքն է: Հարազատները, սակայն, պնդում են, որ երեխան տանը վայր չի ընկել: «Շենգավիթ» բուժկենտրոնում, որտեղ հունվարի 10-ին ծնվել էր փոքրիկը, նույնպես բացառել են, որ երեխան կարող էր հիվանդանոցում մարմնական վնասվածք ստանալ:

Դուրս գրվելիս հարազատները փոքրիկի գլխի հետեւի ձախ կողմում նկատել են անհարթություն, սակայն կարեւորություն չեն տվել՝ մտածելով, որ նա 8 օր շարունակ բժիշկների հսկողության ներքո է եղել: Փոքրիկին հետագայում երկու այլ բուժկենտրոն հետազոտության են տարել։ Երեխային վերաբերող բոլոր բժշկական փաստաթղթերն առգրավվել են:

Դոլարը, եվրոն եւ ռուբլին թանկանում են: Դոլարի փոխարժեքն այսօր կազմել է 486 դրամ, եվրոյինը՝ 517, ռուբլունը՝ 8 դրամ 51 լումա, ֆունտինը՝ 608 դրամ:

Փետրվարի 17-ին հանրապետության մի շարք մարզերում եւ Արցախում ձյուն է սպասվում, առանձին հատվածներում՝ մառախուղ: Օդի ջերմաստիճանը կնվազի 8-10 աստիճանով: Երեւանում վաղը փոփոխական ամպամածություն է սպասվում, հնարավոր է թույլ ձյուն: Մայրաքաղաքում գիշերը կդիտվի -15-17, ցերեկը՝ -4-6 աստիճան ցուրտ: