Արցախում անցած տարվա հունիսին ժամկետային զինծառայող Ալբերտ Դալլաքյանի ծանր վիրավորում հասցնելու գործն ուղարկվել է դատարան:
Դատական տեղեկատվական համակարգից տեղեկացանք, որ գործն ուղարկվել է Սյունիքի մարզի ընդհանուր իրավասության դատարան: Գործի վերաբերյալ մանրամասները համակարգում փակ է, չնայած նիստերն ամենայն հավանականությամբ կանցկացվեն դռնբաց:
Նշենք, որ Ալբերտ Դալլաքյանին վիրավորելու համար մեղադրանք է առաջադրվել դասակի հրամանատար, լեյտենանտ Ավագ Նահապետյանին: Ըստ Քննչական կոմիտեի տարածած հաղորդագրության՝ նախնական քննության տվյալներով՝ ժամկետային զինծառայող, շարքային Ալբերտ Դալլաքյանը գլխի շրջանում հրազենային վիրավորում է ստացել 2016թ. հունիսի 24-ին՝ ժամը 16:10-ի սահմաններում, N զորամասի պահպանության տակ գտնվող մարտական դիրքի գետնատնակում՝ դասակի հրամանատարի կողմից զենքի հետ վարվելու կանոնները խախտելու հետևանքով:
Մասնավորապես՝ պարզվել է, որ դասակի հրամանատար, լեյտենանտ Ա.Նահապետյանը ինքնաձիգը լիցքավորելուց հետո պատահաբար սեղմել է ձգանը, ինչի արդյունքում արձակված գնդակը դիպել է գետնատնակում գտնվող Ա.Դալլաքյանի գլխին՝ անզգուշությամբ պատճառելով գլխի հրազենային գնդակային միջանցիկ վիրավորում՝ կյանքին վտանգ սպառնացող:
Լեյտենանտին մեղադրանք է առաջադրվել Քրեական օրենսգրքի 373-րդ հոդվածի 2-րդ մասի հատկանիշներով:
Նշենք, որ Ալբերտի ծնողները սկզբում չեն իմացել, թե ինչ պայմաններում է նա վիրավորում ստացել, ավելի ուշ են պարզել միայն՝ լեյտենանտ Ավագ Նահապետյանն է կրակել: Դալլաքյաններն իմացել են, թե անզգույշ կրակոց է եղել, վերջերս էլ զորամասից տեղեկացել են, թե Նահապետյանը «խաղացել է» ուրիշի զենքով եւ այդ ժամանակ կրակել:
Ալբերտ Դալլաքյանը բռնցքամարտիկ է, ՌԴ-ից վերադարձել էր՝ հատուկ Արցախում ծառայելու համար: Նրա վիրավորվելուց հետո ընտանիքը վերադարձել է Երեւան: