Հանրապետության 30 դպրոցի եւ մանկապարտեզի տնօրեն, որոնք ըստ «Իրազեկ քաղաքացիների միավորման» ՀԿ-ի՝ խորհրդարանական ընտրությունների համար ձայն են հավաքագրել Հանրապետական կուսակցության համար, հայց են ներկայացրել՝ ընդդեմ ՀԿ-ի եւ Դանիել Իոաննիսյանի:

NEWS.am-ի հետ զրույցում Դանիել Իոաննիսյանը նշեց, որ հայցադիմումները դեռ չեն ստացել, սակայն գիտեն արդեն, որ 30 տնօրեն պահանջում է իրենցից հերքում եւ որպես փոխհատուցում 2 միլիոնական դրամ:

«Մի կողմից, պետական ոչ առեւտրային կազմակերպությունների ղեկավարներ են, մեկը մյուսին կրկնող հայցեր են ներկայացրել, ՀՀԿ-ի անդամներ են մեծ մասը, կարող են դատի տալ, պահանջել 1 մլրդ դրամ, մյուս կողմից այլ հարց է դատարանի դիրքորոշումը: Մենք վստահ ենք՝ որեւէ մեկին չենք զրպարտել, բարեխղճորեն հրապարակել ենք մեր հավաքած տեղեկությունները: Եթե հայցերը մերժելուց տարբեր այլ որոշումներ կայացվեն, մենք դա կդիտարկենք որպես իրավունքների իրացման դեմ Խոսքի ազատության իրացման դեմ ոտնձգություն»,- ասաց նա:

Հիշեցնենք, որ «Իրազեկ քաղաքացիների միությունը», որն ընտրություններին դիտորդական առաքելություն կիրականացնի, հօգուտ իշխանության վարչական ռեսուրսների շատ օգտագործումներ է արձանագրել։ Մասնավորապես՝ ավելի քան 100 դպրոցների եւ մանկապարտեզների տնօրեններ հատուկ ցուցակներ են կազմել հօգուտ ՀՀԿ-ի։