Երեւանի քաղաքապետի թեկնածու Նիկոլ Փաշինյանը քիչ առաջ այցելել է Մաշտոցի պողոտա, ուր ասֆալտապատման նպատակով կտրտած է ասֆալտի որոշ հատվածներ։
«Համապատասխան ծառայությունները քանդել են ասֆալտը եւ Երեւանի Մաշտոցի պողոտան, կարելի է ասել հանրապետության թիվ մեկ պողոտան արդեն որքան ժամանակ, 4-5 օր, այս վիճակում են: Ինչ-որ մարդկանց մտքով անցել է, որ կարելի է Մաշտոցի պողոտան քանդել եւ 4 օր պահել այդ վիճակում: Սա ինչի՞ համար է արվում, ուզում են ցույց տալ, որ Տարոն Մարգարյանը ասֆա՞լտ է անում: Այստեղի երթեւեկությունն արդեն 4 օր կաթվածահար է», - ֆեյսբուքյան էջի ուղիղ եթերում հայտարարել է Նիկոլ Փաշինյանը եւ տեսանյութ տեղադրել:
«Պետք է քթի ծակ ունենալ եւ հասկանալ, որ չի կարելի Երեւանի գլխավոր պողոտան կաթվածահար վճակում պահել։ Սա ցույց է տալիս, որ Երեւանում փաստացի քաղաքային իշխանություն չկա, կամ քաղաքային իշխանության խնդիրը ժողովրդի նյարդերի հետ խաղալն է: Սա ուղղակի անթույլատրելի վիճակ է»,-ընդգծել է Փաշինյանն ու հավելել. «Ուզում եմ ուղղակի ասել, որ, Տարոն ջան, սիրուն չի, սա ուղղակի նշանակում է մարդկանց պրկված նյարդերի հետ խաղալ»:
Փաշինյանը նշեց, որ իր կողմից Երեւանի քաղաքապետի պաշտոնն ստանձնելուց հետո այսպիսի երեւույթները կբացառվեն. «Դեռ պետք է պարզաբանվի, թե ում մեղավորությունն է սա, որ մարդիկ արդեն մեկ շաբաթ ոչ միայն Մաշտոցի պողոտայում, այլ քաղաքի փոքր կենտրոնը վերածել են անթույլատրելի վիճակի»:
Նշենք, որ Երեւանի ավագանու ընտրությունները կայանալու են մայիսի 14-ին, որին մասնակցում են երեք ուժեր՝ ՀՀԿ-ն, որի քաղաքապետի թեկնածուն Տարոն Մարգարյանն է, «Ելք» դաշինքը, որի քաղաքապետի թեկնածուն Նիկոլ Փաշինյանն է, եւ «Երկիր Ծիրանի» կուսակցությունը, որի թեկնածուն Զարուհի Փոստանջյանն է: