Ինգուշեթիայի խորհրդարանի խոսնակ Զելիմխան Եվլոեւը առաջարկել է հարսնացուների առեւանգման համար պատժել մինչեւ երեք տարի ազատազրկումով։ Նա նաեւ հանձնարարել է համապատասխան օրինագիծ մշակել, հայտնում է ՏԱՍՍ-ը։
«Վերջերս, չնայած իշխանությունների ձեռնարկած քայլերին, հանրապետությունում ու Հյուսիսային Կովկասի մյուս շրջաններում գրանցվել են հարսնացուների առեւանգման դեպքեր։ Այդ կապակցությամբ որոշել եմ նախաձեռնել Պետդումայի կողմից այնպիսի օրենքի ընդունում, որը պատասխանատվություն կսահմանի ամուսնանալու նպատակով մարդուն առեւանգելու համար»,- պատմել է Եվլոեւը։
Նա շեշտել է, որ հաճախ հարսնացուների առեւանգման պատմությունները արյունահեղության պատճառ են դառնում։ Նրա խոսքով գործող ՔՕ-ը հաշվի չի առնում այդ արարքի հասարակական վտանգը։
Եվլոեւը նշել է, որ ինքն արդեն հանրապետության խորհրդարանականներին հանձնարարել է մանրակրկիտ քննարկել այդ հարցն ու մշակել օրինագիծ։